Президент Шавкат Мирзиёевга Бухоро шаҳрининг бош режаси тақдим этилди. Бу ҳақда президент матбуот хизмати хабар қилди.
Қайд этилишича, унда қулай шаҳар муҳитини шакллантириш, транспорт ва туризм инфратузилмасини ривожлантириш, шунингдек, конгресс-холл, амфитеатр, кутубхона кабиларни ўз ичига оладиган кўп функцияли мажмуа сифатида тарихий-этнографик боғ барпо этиш назарда тутилган.
Комплексда фуд-холл, чакана савдо ва тижорат объектлари ҳамда юқори тоифали меҳмонхонани қуриш ҳам режалаштирилган.
Эслатиб ўтамиз, президент 2024 йил 31 май куни Бухоро вилоятига ташрифи чоғида Бухоро шаҳрини 2045 йилгача ривожлантириш концепцияси билан танишганди.
Шаҳарда “Янги Ўзбекистон” массиви ва боғи бунёд этилиши режалаштирилган. Боғда Бухоро тарихи замонавий ёндашувлар асосида намоён этилиши кўзда тутилган. Бу лойиҳанинг ғоявий мазмуни ва техник-иқтисодий асосларини ишлаб чиқиш бўйича кўрсатмалар берилган.
