Англиянинг “Манчестер Юнайтед” клуби расмий сайти Майкл Керрик жамоанинг жорий мавсум якунига қадар бош мураббийи этиб тайинланганини эълон қилди.
Янги бош мураббий Майкл Керрик тайинловдан сўнг клуб матбуот хизматига интервью берди.
“‘Манчестер Юнайтед’ни бошқариш мен учун катта шараф. Бу ерда муваффақиятга эришиш учун нималар талаб этилишини яхши биламан. Ҳозирда асосий эътиборим футболчиларга ушбу буюк клубдан кутиладиган даражага етишларига ёрдам беришга қаратилган. Биз ушбу жамоа буни амалга оширишга тўлиқ қодир эканини биламиз. Аввал ҳам бир қатор футболчилар билан бирга ишлаганман, албатта, сўнгги йилларда жамоанинг ўйинларини диққат билан кузатиб бордим. Уларнинг истеъдоди, фидойилиги ва бу ерда муваффақиятга эришиш салоҳиятига тўлиқ ишонаман. Бу мавсумда олдимизда ҳали кўп ишлар турибди. Биз барчани бирлаштириб, мухлисларга улар муносиб бўлган футболни намойиш этишга тайёрмиз”, деди Керрик.
Керрик 2006–2018 йиллар давомида “қизил иблислар” сафида тўп сурган ва шундан сўнг футболчилик фаолиятини якунлаган. Шунингдек, у “Манчестер Юнайтед”да Оле-Гуннар Сульшер штабида ёрдамчи мураббий сифатида ишлаган. Кейинчалик норвегиялик мутахассис истеъфога чиққанидан сўнг жамоани вақтинча бошқарган. Унинг сўнгги иш жойи “Мидлсбро” бўлиб, Керрик клубни 2025 йил ёзида тарк этган.
Маълумот учун, 5 январь, душанба куни “Манчестер Юнайтед” Рубен Аморим билан хайрлашганини эълон қилганди. Португалиялик мутахассис жамоани 2024 йил 11 ноябрида қабул қилиб олган. Манкунианликлар Аморим қўл остида 63 та учрашув ўтказган бўлиб, 25 та ғалаба, 15 та дуранг ва 23 та мағлубият қайд этган. Айни пайтда “Манчестер Юнайтед” Англия Премьер Лигаси турнир жадвалида 32 очко билан 7-ўринни эгаллаб турибди.
