Англиянинг “Манчестер Юнайтед” клуби жорий мавсумда нафақат УЕФА Чемпионлар Лигасига йўлланма олиш, балки турнир жадвалининг энг юқори поғоналаридан жой эгаллашни мақсад қилган.
Жамоа Майкл Керрик бошқарувида учинчи ўринга кўтарилди ва мавсум якунига саноқли ўйинлар қолган бир пайтда Чемпионлар Лигаси йўлланмаси сари ишонч билан ҳаракат қилмоқда.
Ёрдамчи мураббий Стив Ҳолланд клуб олдига қўйилган вазифалар оддийгина кучли тўртлик ёки бешликдан жой олиш билан чекланмаслигини таъкидлади.
Унинг сўзларига кўра, жамоа имкон қадар биринчи ўринга яқинлашишни ва ҳар бир учрашувда максимал натижа қайд этишни асосий мақсад сифатида белгилаган.
Маълумот учун, “Манчестер Юнайтед” АПЛ турнир жадвалида 31 та учрашувда 55 очко жамғарган голда учинчи ўринда бормоқда. Жамоа пешқадам “Арсенал”дан 15 очкога ортда қолмоқда.
Майкл Керрик бош мураббий этиб тайинланганидан буён жамоа 10 та учрашув ўтказди. Ушбу баҳсларнинг 7 тасида ғалаба қозонилди, 2 марта дуранг қайд этилди ва фақат бир бор мағлубиятга учралди. Шуни ҳам қайд этиш керакки, сўнгги учта ўйиннинг иккитасида манчестерликлар очко йўқотишди.
