Лондоннинг “Арсенал” клуби “Ньюкасл Юнайтед”нинг ўнг қанот ҳимоячиси Валентино Ливраментога жиддий қизиқиш билдирмоқда. Микель Артета жамоаси 23 ёшли футболчини 2026-йилнинг ёзида сотиб олиш имкониятини кўриб чиқмоқда. Бу ҳақда The Sun нашри хабар берди.
Манбага кўра, “канонирлар” Ливраменто учун курашда “Манчестер Сити” билан рақобатга дуч келиши мумкин. Қайд этилишича, “шаҳарликлар” инглиз футболчисига узоқ вақтдан бери қизиқиш билдириб келади. Ўтган мавсумда “Ньюкасл” ҳимоячини бошқа клубга сотиш учун камида 60 миллион фунт стерлинг (69 миллион евро) сўраган.
“Ньюкасл” раҳбарияти эса футболчини жамоада сақлаб қолиш учун уни энг юқори маош олувчи футболчилардан бирига айлантиришни режалаштирмоқда. Клуб Ливраментога олти йиллик янги шартнома таклиф этмоқчи. Ҳозирда жамоанинг энг кўп маош оладиган футболчиси — йиллик даромади қарийб 10 миллион еврога тенг бўлган бразилиялик ярим ҳимоячи Бруно Гимараеш ҳисобланади.
Маълумот учун, жорий мавсумда Ливраменто “Ньюкасл” сафида жами 18 та учрашувда майдонга тушиб, битта голли узатма муаллифига айланган. Футболчининг клуб билан шартномаси 2028 йил ёзигача амал қилади. Transfermarkt порталига кўра, Валентинонинг бозор қиймати 40 миллион еврони ташкил этади.
