“Манчестер Сити” устози Хосеп Гвардиола учун футболдаги тактик чизмалар ва янги совринлар ҳозирча иккинчи даражали масалага айланган. Англия Лига Кубоги финали олдидан ўтказилган матбуот анжуманида мураббий стратегия ҳақидаги саволга кутилмаганда глобал муаммолар ҳақида гапириб жавоб қайтарди.
Бўлажак рақиб таҳлили ўрнига, Гвардиола диққатни дунёдаги инқирозларга қаратишни афзал билди. Мураббийнинг фикрича, замонавий жамият футбол каби кўнгилочар соҳаларга ҳаддан ташқари берилиб кетиб, сайёрадаги ортга қайтмас жараёнларга кўз юммоқда.
“Дунёда содир бўлаётган воқеаларга назар ташланг: биз мисли кўрилмаган тартибсизликлар гирдобига тушиб қоляпмиз, аммо ҳеч ким буни тўхтатиш учун ҳаракат қилмаяпти. Барча жараёнлар саҳна ортида кечмоқда. Дунё ҳалокат сари бормоқда. Биз эса ҳамон бу ерда ўтириб, у ёки бу жамоа ёхуд бўлажак ўйин ҳақида баҳслашяпмиз. Бугун дунёда футболдан анча муҳимроқ муаммолар мавжуд”, дея таъкидлади Гвардиола.
Эслатиб ўтамиз, Англия Лига Кубоги финали доирасидаги “Арсенал” — “Манчестер Сити” баҳси бугун, 22 март якшанба куни бўлиб ўтади. Ўйин Тошкент вақти билан соат 20:30 да старт олади.
Маълумот ўрнида, 28 февраль куни АҚШ ва Исроилнинг Эронга қарши ҳарбий амалиёт бошлади. Шунингдек, бошқа мамлакатлар ўртасида ҳам сиёсий вазиятлар кескин тус олган.
