“Манчестер Сити”га қарши ўйиндан сўнг Микель Артета шундай деди:
“Бугундан ҳаммаси нолдан бошланмоқда. Бизда уч очко бор, “Манчестер Сити”да битта захира ўйин, имкониятлар тенг – ўйин бошланди”.
Бир қарашда, тўғри фикр, эътироз билдириш қийин, агар Гвардиола шогирдлари “Кристал Пэлас”га қарши қолдирилган ўйинни ҳам ютади деб ҳисобласак, шунда ҳам очколар тенг бўлади. Тўплар нисбатига кўра рақобат бошланганда, “Арсенал”да ҳам кўпроқ гол уриш имконияти бор, ҳатто бир қарашда, рақиблар ҳам “Манчестер Сити”никига нисбатан осонроқдек туюлмоқда. Бунинг устига “Арсенал” қолган беш ўйинни ҳам Лондондан чиқмасдан ўтказади. Умуман нега энди АПЛда рақиби билан тенг имконият ҳосил қилган ва Чемпионлар Лигаси финали остонасида турган жамоага нисбатан танқидлар ёғилмоқда-ю, “Манчестер Сити” қаҳрамонга айланиб қолди? Хавотир учун қанчалик асос бор?
Тақвим
Келинг аввал тақвимга юзланамиз.
Юқоридаги жадвалга қараб, кўп жиҳатларга эътибор қаратиш мумкин. Айтилганидек, “Арсенал”нинг рақиблари осонроқ кўринади. Ягона тўсиқ – “Вест Ҳэм” стадионига сафар бўлиши мумкин. “Вест Ҳэм” лигада қолиш учун сўнгги турларгача курашиш эҳтимоли катта, табиийки, “Арсенал” учун энг қийин рақиб ҳам шу бўлади. Шунингдек, қаторасига тўрт ўйиндан бери мағлубиятга учраб келаётган “Ньюкасл” келаётган шанбада етарлича муаммо туғдириши мумкин.
“Манчестер Сити” – “Кристал Пэлас” ўйини ҳозирда АПЛ сайтида 22 майга қўйилган бўлса-да, бу шартли муддат бўлиб, ҳали ўзгариши аниқ, зеро жамоалар 48 соатда икки ўйинда майдонга тушиши тақиқланган. Катта эҳтимол, “Манчестер Сити”нинг Англия Кубоги, “Кристал Пэлас”нинг эса Конференциялар Лигасидаги ярим финаллари натижасига қараб қўшимча очиқ кунлар пайдо бўлиши ва ушбу ўйин вақти сурилиши мумкин.
Қўшимча турнирлар
Ҳар икки жамоада ҳам АПЛ ўйинларидан ташқари биттадан турнир бор. Албатта, “Арсенал”нинг бу борада вазифаси оғирроқ. Ҳафта ўртасида икки марта “Атлетико”га қарши муҳим ва ўта кўп куч оладиган ўйинларда майдонга тушишга тўғри келади.
“Манчестер Сити” еврокубокларсиз гўёки ҳафтада бир ўйин режимида ўйнаши мумкиндек кўринса-да, Англия Кубоги туфайли бу жамоада ҳам тиғиз календарь бор. Биринчидан, шундоқ ҳам юқорида айтилган “Кристал Пэлас”га қарши учрашув ҳафта ўртасига тушмоқда. Иккинчидан, келаётган шанбада “Саутгемптон”га қарши ярим финал борлиги туфайли, бу ҳафта ҳам “Бёрнли”га сафар қилади. Шунингдек, мабодо “Манчестер Сити” кубок финалига чиқадиган бўлса, ўша кунлари ўтиши керак бўлган “Борнмут”га қарши ўйин ҳам ҳафтанинг ўртасига кўчирилиши мумкин.
Демак, Чемпионлар Лигаси финали АПЛ тугаганидан сўнг бўлиб ўтишини эътиборга олсак, сўнгги бир ойда “Арсенал” 7 ўйинда майдонга тушса, “Манчестер Сити” 8 ўйинда майдонга тушади, яъни тиғизроқ тақвимга эга. Албатта, “Саутгемптон” ёки “Кристал Пэлас”га қарши ўйинларни “Атлетико” билан ўйинларга қиёслаб бўлмайди.
Спорт формаси
“Манчестер Сити”ни фаворитга айлантираётган яна бир жиҳат жамоаларнинг айни пайтдаги спорт формасидир. “Манчестер Сити” сўнгги 4 ўйинни “Арсенал”, “Ливерпуль”, “Челси” ва яна “Арсенал”га қарши ўтказди ва тўрт ғалабага эришди. Тўплар нисбати 11-1 ва ўша ўтказиб юборилган бир гол ҳам Доннарумманинг қўпол хатосидан кейин тасодифан юзага келди.
Мана шу натижалар фонида “Арсенал”нинг ҳолати жуда ёмон кўринади. Жамоа сўнгги 6 ўйинда фақат бир марта “Спортинг”ни енгди, бир дуранг ва 4 мағлубият. Англия ичкарисидаги турнирларнинг ўзинигина олсак, “Арсенал” қаторасига 4 ўйинни бой берди. Мана шу тўрт ўйинда жамоа ҳам икки кубокни, ҳам Премьер Лигадаги устунликни бой бериб қўйгани жамоага руҳан қаттиқ таъсир қилгани табиий.
Фақатгина сўнгги ўйиндаги баъзи жиҳатлар жамоа у қадар иложсиз эмаслигини кўрсатди ва кейинги ўйинларга ишонч уйғотди. “Этиҳад”да биз “Борнмут”га қарши ўйиндаги каби “Арсенал”ни кўрмадик, аксинча, жамоа анча дадил ҳаракат қилди, яратилган вазиятлар, прессинг ҳаракатлар бўйича мезбонлардан устунлик қилди ҳам.
Юқоридаги расмга эътибор беринг, ҳали ҳисоб 1:1 эканида Эзенинг зарбаси устунга теккан вазият. Стандарт вазиятдаги ҳолат бўлмаса-да, лондонликларнинг бирйўла 9 футболчиси рақиб жарима майдонига яқин жойлашган. Яъни бу сафар Артета анча ташаббускор ва дадил тактика танлаганини ва бу шартларда ҳам жамоа ёмон кўринмаганини гувоҳи бўлдик. Айтиш мумкинки, “Арсенал”да ўйин борасида инқироз йўқ, муҳими, “Этиҳад”даги мағлубиятнинг таъсири кейинги ўйинларга кўчмаслигини таъминлаш.
Чемпионлик характери
Аммо сўнгги турларда энг аҳамиятли даражага чиқадиган фактор айнан “Манчестер Сити”да бор. Жамоанинг бугунги таркиби ёш ва янги келган футболчилардан иборат бўлса-да, масалан, Родри ва Бернарду Сильва каби етакчиларнинг бундай паллаларда ўзини қандай тутиши, улардаги хотиржамлик жамоага қанчалик таъсир қилишини гувоҳи бўлдик. “Арсенал” сўнгги тўрт йилда чемпионлик учун курашиб келган бўлса-да, шундай пойгаларни ютиш тажрибаси айнан “Манчестер Сити”да бор.
Энди фактларга мурожаат қиламиз ва нега ҳамма “Манчестер Сити”нинг пойгага қўшилишидан бунчалик хавфсирашига амин бўламиз. Гап бу ерда фақат “Арсенал”да эмас, “Ливерпуль” ҳам кўп марта Гвардиоланинг мана шу хусусиятидан азият чеккан.
Юқорида “Манчестер Сити” Пеп Гвардиола қўл остида ҳар мавсумда сўнгги 6 турни қандай ўтказгани акс этган – 54 ўйин, 44 ғалаба, 6 дуранг, 4 мағлубият. Статистик томондан қараганда, ҳар 5 ўйиндан 1 тасида жамоа очко йўқотган, “Арсенал” учун айни муддаодек, лекин вазиятга чуқурроқ қарасак-чи?
Жамоа чемпионлик пойгасида қатнашган ва ғалаба зарур бўлган ўйинларда (масалан, 2018/19, 2021/22, 2023/24 каби мавсумлар) натижалар деярли хатосиз. Масалан, 2016/17, 2019/20, 2024/25 мавсумларда “Манчестер Сити” муддатидан олдин пойгадан чиқиб кетиб бўлган ва сўнгги турлар ҳеч нарсани ҳал қилмасди. 2017/18 мавсумда ҳам 33-турдаги ғалаба “Манчестер Сити”ни чемпион қилган ва кейинги турларнинг аҳамияти бўлмаган.
Энди қаранг, айнан чемпионлик учун очко зарур бўлган 25 (!) ўйиндан “Манчестер Сити” 24 тасини ўз фойдасига ҳал қила олган. Битта дуранг бор, лекин аслида ўшанда “Сити”га охирги 2 турда 4 очко керак эди – жамоа сафарда “Вест Ҳэм” билан дуранг ўйнаб, кейин ўз майдонида “Астон Вилла”ни мағлубиятга учратган. Яъни Пеп Гвардиола “Манчестер Сити”ни бошқариб келаётганидан бери ҳеч қачон жамоа чемпионлик пойгасида очко йўқотмаган. Доим керакли ҳисобни қўлга кирита олган.
Буни фақат Пеп Гвардиола билан боғламаслик ҳам мумкин. “Манчестер Сити” чемпион бўлган аввалги мавсумларни эслайлик. Сўнгги сонияда Агуэронинг голи ҳал қилиб кетган 2011/12 йилги мавсумда “Манчестер Сити” охирги 6 ўйинни, Стивен Жеррард сирпаниб тушган 2013/14 мавсумда эса охирги 5 ўйинни ғалаба билан якунлаган.
Албатта статистик фактлар келажакдан башорат қила олмайди, шунчаки имкониятларни чамалаш учун керак холос. Умид қиламизки, бу икки жамоа сўнгги турларгача юқори даражани ушлай олишади ва биз балки АПЛ тарихидаги энг қизиқарли пойганинг гувоҳи бўламиз.
