Opta статистик портали Англия Премьер Лигасининг 33-туридан сўнг жамоаларнинг чемпионлик имкониятларини баҳолади.
“Манчестер Сити”га қарши ўзаро ўйиндаги мағлубиятга қарамасдан (1:2) асосий фаворит сифатида Лондоннинг “Арсенал” клуби кўрсатилди. “Канонирлар”нинг чемпионлик эҳтимоли 73,04 фоизга баҳоланган.
Иккинчи ўринда 26,96 фоиз кўрсаткич билан “Манчестер Сити” жойлашган. Қолган жамоаларнинг чемпионлик эҳтимоли эса нолга тенг деб ҳисобланмоқда.
Айни пайтда Англия Премьер Лигаси турнир жадвалида биринчи ўринни “Арсенал” эгаллаб турибди — 70 очко. Микель Артета шогирдлари иккинчи ўриндаги “Манчестер Сити”ни уч очкога ортда қолдирган. Бироқ “Манчестер Сити”да битта қолдирилган ўйин мавжуд бўлиб, 22 май куни “Кристал Пэлас”га қарши бўлиб ўтади.
Учинчи поғонада 58 очко билан “Манчестер Юнайтед” бормоқда. Тўртинчи ўриндаги “Астон Вилла” ҳисобида ҳам 58 очко мавжуд. Шунингдек, АПЛ турнир жадвалида кейинги ўринларда “Ливерпуль” (55 очко) ва “Челси” (48 очко) жойлашган.
Opta порталига кўра, “Арсенал” олдинда турган 5 та учрашувдан (“Ньюкасл”, “Фулҳэм”, “Вест Ҳэм”, “Бёрнли” ва “Кристал Пэлас”) сўнг якунда 80 очко жамғаради ва АПЛ ғолиби бўлади. “Манчестер Сити” эса (“Бёрнли”, “Эвертон”, “Брентфорд”, “Борнмут”, “Астон Вилла” ва “Кристал Пэлас”) якунда 78 очко билан 2-ўринни эгаллаши кутилмоқда.
Маълумот учун, АПЛ номи остида (1992-йилдан буён) энг кўп чемпионликни “Манчестер Юнайтед” қўлга киритган — 13 марта. Кейинги ўринларда “Манчестер Сити” (8 марта), “Челси” (5 марта), “Арсенал” (3 марта), “Ливерпуль” (2 марта), “Блекберн” (1 марта) ва “Лестер” (1 марта) қайд этилган.
