“Реал Мадрид” клуби бош мураббийи Хаби Алонсо ҳужумчи Килиан Мбаппенинг Испания Суперкубоги финалида “Барселона”га қарши ўйинда майдонга тушиш эҳтимоли ҳақида фикр билдирди. Унинг фикрича, франциялик футболчи “Эл-Класико”да иштирок этиши мумкин. Бу ҳақда Мадрид клуби матбуот хизмати хабар берди.
“Мбаппе тез орада етиб келади. Унинг ўйнашга тайёр ёки йўқлигини тиббий штаб билан муҳокама қиламиз. Аҳволи анча яхшиланди, машғулотларда қатнашди ва ўзини яхши ҳис қиляпти. Унинг майдонга тушиш имконияти таркибдаги бошқа футболчиларники билан бир хил”, — деди Алонсо учрашувдан кейинги матбуот анжуманида.
Маълумот учун, Килиан Мбаппе жароҳати сабаб Суперкубок ярим финали доирасидаги “Атлетико”га қарши баҳсни ўтказиб юборган эди. Ушбу учрашувда “Реал Мадрид” Федерико Вальверде ва Родригонинг голлари эвазига 2:1 ҳисобида ғалаба қозониб, финал йўлланмасини қўлга киритди. Ҳал қилувчи баҳсда “қаймоқранглилар”га “Барселона” рақиблик қилади.
Испания Суперкубоги финали 12 январга ўтар кечаси Тошкент вақти билан соат 00:00 да Саудия Арабистонининг Жидда шаҳридаги “Қирол Абдулла” стадионида бўлиб ўтади.
Килиан Мбаппе “Қироллик клуби” сафида 2024 йил ёзидан буён тўп сурмоқда. У шу вақтга қадар “Реал” таркибида 83 учрашувда 73 та гол уриб, 10 та голли узатма муаллифи бўлган. Жорий мавсумда эса барча мусобақаларда 24 ўйинда 29 та гол ва 5 та ассист қайд этган.
Мбаппенинг Мадрид клуби билан амалдаги шартномаси 2029 йил ёзига қадар мўлжалланган. Transfermarkt портали маълумотларига кўра, футболчининг бозор қиймати 200 миллион еврони ташкил этади.
