25 декабрь куни Ўзбекистон футбол ассоциацияси миллий терма жамоа бош мураббийи Фабио Каннаваронинг 2026-йилги Жаҳон чемпионатига тайёргарлик бўйича режасини Ўзбекистон профессионал футбол лигасига тақдим этган. Ушбу режага кўра, 2026-йилнинг 5 май санасидан бошлаб Суперлига учрашувларини ўтказиш имкони бўлмайди. Шу сабабли Лига аввалроқ тасдиқланган мусобақа тақвимига ўзгартириш киритишга мажбур бўлди. Бу ҳақда ЎзПФЛ матбуот хизмати хабар берди.
Лига томонидан ишлаб чиқилган янги тақвим тезда клубларга тақдим этилган бўлиб, барча жамоалар белгиланган муддатда ушбу тақвимга розилик билдирган.
Миллий терма жамоа 5 майдан бошлаб маҳаллий футболчилар иштирокида йиғинга киришади. Режага кўра, Ўзбекистон терма жамоаси 10, 17 ва 24 май кунлари Суперлиганинг етакчи клубларига қарши ўртоқлик учрашувлари ўтказади. Ушбу жараён июнь ойидаги FIFA кунлари билан узвий боғлиқ ҳолда давом эттирилади.
Май, июнь ва июль ойларида юзага келадиган узоқ танаффус Суперлига яхлитлигига таъсир кўрсатмаслиги мақсадида май ойининг қолган қисми Ўзбекистон кубоги учрашувлари билан тўлдирилади.
Шунингдек, ЎзПФЛ 2027-йилги Осиё Кубоги яқинлашиб келаётганини ҳам ҳисобга олган бўлиб, миллий жамоага номзод футболчиларнинг декабрь ойида қисқа таътилга чиқиши ва Осиё Кубоги олдидан йиғинларга тайёрланиши керак. Шу боис ЖЧ–2026 якунидан кейин режалаштирилган мавсумнинг иккинчи қисми 20 июлдан старт олади.
Суперлиганинг сўнгги тури 3 декабрь санасига белгиланди. Ўтиш ўйинлари ва Ўзбекистон кубоги ярим финалида иштирок этмайдиган клублар ушбу санадан сўнг танаффусга чиқади. Ўтиш ўйинлари доирасидаги тўрт учрашув қисқа муддатда ва марказлашган ҳолда Тошкент шаҳрида ўтказилади. Бу қарор логистика билан боғлиқ муаммоларни камайтириш ҳамда футболчиларнинг тикланиш имкониятларини инобатга олган ҳолда қабул қилинган.
Ёзги трансфер ойнаси 22 июндан 24 июлгача давом этади. Ушбу даврда клуб таркибига қўшилган футболчиларни Суперлиганинг 14-туридан бошлаб қайдномага киритишга рухсат этилади.
