Ҳимоячи Трент Александер-Арнольд Мадриднинг “Реал” клубини тарк этиши мумкин. Бу ҳақда Give me Sport нашрига таяниб, “Championat.cом” хабар берди.
Англиялик футболчи ўтган ёзда “Ливерпуль”дан “Реал”га эркин агент сифатида ўтганди. Бироқ жароҳатлар ва бошқа муаммолар унинг янги жамоага мослашишига жиддий тўсқинлик қилмоқда.
Манбага кўра, Александер-Арнольдга Англия Премьер Лигасининг уч клуби — “Манчестер Сити”, “Манчестер Юнайтед” ва “Ньюкасл” қизиқиш билдирмоқда. Хабарларда мазкур клублар футболчининг трансфери учун 40 миллион евро тўлашга тайёр эканлиги айтилмоқда. Трент “Реал”га атиги 10,5 миллион евро эвазига келиб қўшилганди.
Ҳозирга қадар ҳимоячи Ла Лигада саккизта, Чемпионлар Лигасида эса учта учрашувда майдонга тушган. Сон мушаги ва сон ости пайи билан боғлиқ жароҳатлар уни мунтазам равишда ўйин амалиётидан маҳрум қилмоқда. “Ливерпуль”да ўйнаган даврида юқори самарадорлик кўрсатган Александер-Арнольд Испанияда бор-йўғи битта ассист билан кифояланмоқда. Мазкур ҳолат ортидан унинг Англия Премьер Лигасига қайтиш эҳтимоли юқори баҳоланмоқда.
Transfermarkt портали футболчининг қийматини 70 миллион еврога баҳоламоқда. Унинг клуб билан шартномаси 2031-йилнинг ёзига қадар амал қилади.
