Мадриднинг “Реал” клуби вингери Винисиус Жуниор жамоанинг собиқ бош мураббийи Хаби Алонсо олиб борган машғулотлар услубидан норози бўлган. Бу ҳақда The Touchline нашри ўзининг X (собиқ Twitter) тармоғидаги саҳифасида маълум қилган.
Манбага кўра, Алонсо “Реал”ни қабул қилиб олганидан кейин ўтказилган илк машғулотни Винисиус “жуда интенсив” дея таърифлаган. Орадан бир неча ой ўтиб эса бразилиялик футболчи билан бир қаторда жамоанинг яна бир нечта етакчи футболчилари ҳам мураббий қарашларини қўллаб-қувватламагани маълум бўлди. Футболчилар машғулот жараёнини ҳаддан ташқари оғир ва чарчатадиган деб ҳисоблаган.
Маълумот учун, Хаби Алонсо Испания Суперкубоги финалида “Барселона”га 2:3 ҳисобида мағлуб бўлганидан сўнг “Реал”ни тарк этди. Мадридликлар бош мураббийлигига эса жамоанинг собиқ футболчиси Альваро Арбелоа тайинланди. Арбелоа бунгача “Реал Мадрид Кастиля” жамоасини бошқариб келган эди.
Айни пайтда Испания Ла Лигасининг 20-туридан кейин Альваро Арбелоа бошчилигидаги “қироллик клуби” 48 очко билан турнир жадвалида 2-ўринни эгаллаб турибди. Мадридликлар пешқадам “Барселона”дан бир очкога ортда қолмоқда (“Барселона” битта кам ўйин ўтказган). Жамоа навбатдаги учрашувини сафарда “Вильярреал”га қарши ўтказади. Учрашув 24 январь куни бўлиб ўтади.
