“Манчестер Сити” ҳужумчиси Эрлинг Ҳоланд Англия Премьер лигасида юқори самарадорлик кўрсатмоқда. Норвегиялик футболчи турнир доирасида урилган голлар сони бўйича Криштиану Роналдуни ортда қолдирди ва энди Алан Ширерга тегишли “абадий” рекорд сари бормоқда.
АПЛнинг 17-тури доирасида “Вест Ҳэм”га қарши учрашувда (3:0) Ҳоланд дубль муаллифига айланди. Ушбу натижа орқали у Англия Премьер лигасидаги ўйинлари сонини 114 тага, киритган голлари миқдорини эса 104 тага етказди.
Мазкур кўрсаткич Ҳоландга Англия Премьер лигаси тарихидаги энг машҳур ҳужумчилардан бири — Криштиану Роналдуни ортда қолдириш имконини берди. Эътиборлиси, норвегиялик футболчи бу маррага португалиялик юлдузга нисбатан 140 та ўйин камроқ ўтказган ҳолда етиб келди.
Статистикага назар ташланса, Ҳоланднинг устунлиги янада яққол кўзга ташланади. У Англия Премьер лигасида ҳар бир ўйинда ўртача 0,9 тадан гол урмоқда — бу лига тарихидаги энг юқори кўрсаткич ҳисобланади. Таққослаш учун, Терри Анри ушбу рейтингда 0,68, Алан Ширер эса 0,59 кўрсаткич билан қайд этилган. Криштиану Роналду эса Англия Премьер лигасида ўртача 0,44 гол билан чекланган.
Бироқ ушбу рақамларни баҳолашда муҳим контекстни ҳам инобатга олиш лозим. Криштиану Роналду “Манчестер Юнайтед” сафида асосан чап қанот вингери сифатида ҳаракат қилган. Ҳоланд эса соф марказий ҳужумчи бўлиб, Хосеп Гвардиола жамоасида асосий гол юкини ўз зиммасига олган. Роналду давридаги “Манчестер Юнайтед”да голлар Криштиану, Уэйн Руни, Карлос Тевес, Нани ва бошқа ҳужумчиларга нисбатан тенг тақсимланган эди.
Жорий мавсумда Ҳоланднинг самарадорлиги янада ошди. У 17 учрашувда 19 та гол уриб, ҳар ўйинда биттадан кўпроқ гол киритиш суръатини ушлаб турибди. Эътиборлиси, ушбу голларнинг атиги биттаси пенальтидан киритилган. Бу ҳолат норвегиялик ҳужумчининг “осон” вазиятларсиз ҳам юқори савияда ўйнаётганини яққол кўрсатади.
Ҳоланд Англия Премьер лигасида аллақачон икки бор — 2022/2023 ва 2023/2024 йилги мавсумларда “Олтин буца” соврини соҳибига айланган. 2022/2023 йилги мавсумда эса у 36 та гол уриб, бир мавсумдаги энг юқори натижа бўйича чемпионат рекордини ўрнатган эди. Агар ҳозирги темп сақланиб қолса, ушбу кўрсаткич ҳам янгиланиши мумкин.
Энг муҳим савол эса Алан Ширер рекордига бориб тақалади. Англия Премьер лигаси тарихидаги энг сермаҳсул футболчи бўлган Ширер ҳозирча Ҳоланддан 156 та гол олдинда. Бироқ англиялик афсона буни норвегиялик ҳужумчига нисбатан 327 та ўйин кўпроқ майдонга тушган ҳолда амалга оширган. Ҳоланд эса чемпионатда эндигина тўртинчи мавсумини ўтказмоқда ва у ҳозир бор-йўғи 25 ёшда.
Агар Эрлинг Ҳоланд ҳозирги 0,9 гол атрофидаги ўртача темпни сақлаб қолса, у 2029/2030 йилги мавсум якунига бориб Алан Ширер рекордини янгилаши мумкин. Ўша пайтда норвегиялик ҳужумчи 29 ёшда бўлади. Бу эса нафақат рекордни янгилаш, балки уни узоқ йиллар давомида “қўл етмас” даражага олиб чиқиш эҳтимолини ҳам оширади.
Қизиғи шундаки, Ҳоланд нафақат клуб миқёсида, балки терма жамоалар даражасида ҳам Криштиану Роналдунинг рекордлари сари яқинлашмоқда. Роналду Португалия терма жамоаси сафида 143 та гол урган бўлса, Эрлинг Ҳоланд Норвегия терма жамоаси сафида ҳозирча 55 та гол муаллифи ҳисобланади. Аммо унинг ҳозирги суръати бу кўрсаткичга ҳам жиддий хавф солмоқда.
Бир сўз билан айтганда, Англия Премьер лигаси янги тарихий босқичга қадам қўймоқда ва ушбу даврнинг марказида Эрлинг Ҳоланд турибди. Ҳозирча эса норвегиялик “гол машинасини” тўхтата оладиган куч кўринмаяпти.
Шунингдек, Transfermarkt портали томонидан янгиланган трансфер қийматлари рейтингида энг қиммат футболчилар сифатида Килиан Мбаппе (“Реал Мадрид”), Ламин Ямал (“Барселона”) ва “Манчестер Сити” ҳужумчиси Эрлинг Ҳоланд қайд этилган. Ушбу футболчиларнинг трансфер баҳоси 200 миллион еврога тенг.
Ҳоланд етакчилигидаги Норвегия терма жамоаси 8 учрашувда 24 очко жамғариб, Жаҳон чемпионати Европа саралаш босқичининг “I” гуруҳида биринчи ўринни эгаллади ва 1998 йилдан буён илк бор мундиал йўлланмасини қўлга киритди.
Маълумот учун, айни пайтда “шаҳарликлар” Англия Премьер лигаси турнир жадвалида 37 очко билан иккинчи ўринни эгаллаб турибди ва пешқадам “Арсенал”дан икки очкога ортда қолмоқда.
