Ўзбекистонга гиёҳвандлик воситаларини мармар тошлар орасига яширган ҳолда олиб келган шахс ва уни сотиш билан шуғулланганлар қамоққа олинди. Бу ҳақда Давлат хавфсизлик хизмати хабар берди.
Республика миқёсида ўтказилаётган “Хавфсиз ва соғлом юрт” тадбирлари доирасида гиёҳвандлик воситаларининг ноқонуний айланмасига қарши курашиш йўналишида ДХХнинг Самарқанд вилояти бўйича бошқармаси, вилоят Ички ишлар бошқармаси ҳамда Божхона бошқармаси ходимлари ҳамкорлигида тезкор тадбир ўтказилган.
Тадбир давомида 1992-йилда туғилган хорижий давлат фуқароси ҳамда Самарқанд вилоятида яшовчи, 1981- ва 1995-йилларда туғилган 3 нафар Ўзбекистон фуқароси қўлга олинган.
Аниқланишича, чет эллик фуқаро қурилишда фойдаланиладиган мармар тошлар орасига гиёҳвандлик воситаларини яширган ҳолда мамлакатга олиб келган, маҳаллий фуқаролар эса уни сотиш билан шуғулланган.
Тезкор тадбир давомида жами 37 килограмм 421 гамм экстракцион опий гиёҳвандлик воситаси ашёвий далил сифатида олинган.
Ҳозирда мазкур шахсларга нисбатан жиноят иши қўзғатилиб, қамоқ эҳтиёт чораси қўлланган.
14 декабрь куни Тошкентда нарколаборатория ташкил қилган йигит ва қиз қамоққа олингани хабар қилинганди. Давлат божхона қўмитаси Тошкент вилоятида машина бензин бакида 30 килодан кўпроқ опий олиб кетаётган шахс ушланганди.
