Бирлашган Араб Амирликларининг Дубай шаҳрида эркаклар ўртасида ўтказилаётган бокс бўйича Жаҳон чемпионати давом этмоқда. Халқаро бокс ассоциацияси (IBA) томонидан ташкил этилган мусобақанинг чорак финал босқичида Ўзбекистон терма жамоасининг 11 нафар боксчиси рингга чиқди ва уларнинг 9 нафари ярим финалга йўл олди.
Дастлаб -48 кг вазн тоифасидаги рингга чиққан Шодиёржон Мелиқўзиэв чорак финалда мусобақа билан хайрлашди. У озарбайжонлик Субҳан Мамедовга қарши кечган жангда 1:4 ҳисобида имкониятни бой берди. -54 кг вазнда Асилбек Жалилов эса сербиялик Артур Нагапетянни 4:1 ҳисобида мағлуб этиб, ярим финал йўлланмасини қўлга киритди.
Абдумалик Ҳалоков ҳам ўз вазнида чорак финалда ғалаба қозонди. У озарбайжонлик Маҳаммадали Аширалиевни 5:0 ҳисобида мағлуб этиб, иккинчи ярим финалчига айланди. -67 кг вазнда рингга чиққан Асадхўжа Мўйдинхўжаев қозоғистонлик Санатали Толтаевни 4:1 ҳисобида мағлуб этиб, навбатдаги босқичга йўл олди. Шунингдек, -75 кг вазн тоифасида Фазлиддин Эркинбоев озарбайжонлик Саиджамшид Жафаровга ҳеч қандай имконият қолдирмади — 5:0.
-86 кг вазн тоифасида рингга кўтарилган Акмалжон Исроилов россиялик Шарабутдин Атаевга 0:5 ҳисобида имкониятни бой бериб, мусобақадаги иштирокини якунлади.
+92 кг вазнда Арман Маханов кубалик тажрибали боксчи Алежандро Лопезни 5:0 ҳисобида мағлуб этди. -51 кг вазнда икки карра Олимпия чемпиони ва Жаҳон чемпиони Ҳасанбой Дўсматов ҳам ярим финал йўлланмасига эга чиқди. У чорак финалда тожикистонлик Мерож Суфижоновга ҳеч қандай имконият қолдирмади — 5:0.
Шунингдек, куннинг иккинчи қисмида -57 кг вазнда Хўжаназар Нортожиев арманистонлик Жираир Сарисянни 4:1 ҳисобида мағлубиятга учратиб, навбатдаги босқичга йўл олди. Жавоҳир Умматалиев эса сербиялик рақибини 5:0 ҳисобида енгиб, ярим финал иштирокчисига айланди. Куннинг охирги жангида -92 кг вазнда Тўрабек Хабибуллаев кубалик икки карра Олимпиада чемпиони ва беш карра жаҳон чемпиони Хулио Ла Крузни 4:1 ҳисобида мағлуб этиб, Ўзбекистон терма жамоаси сафида 9-ярим финалчига айланди.
Бугун, 11 декабрь куни мусобақанинг ярим финал баҳслари ўтказилади. Унда Ўзбекистон терма жамоасининг 9 нафар аъзоси финал йўлланмаси учун кураш олиб боради.
Ярим финал жуфтликлари билан танишинг:
- -54 кг: Асилбек Жалилов — Виачеслав Рогозин (Россия), 17:30
- -60 кг: Абдумалик Ҳалоков— Артур Базеян (Арманистон), 18:00
- -67 кг: Асадхўжа Мўйдинхўжаев — Алеҳандру Парасчив (Молдова), 18:30
- -75 кг: Фазлиддин Эркинбоев — Сабиржан Аккаликов (Қозоғистон), 19:00
- +92 кг: Арман Маханов — Давит Чалоян (Арманистон), 20:00
- -51 кг: Ҳасанбой Дўсматов — Рудолф Гарбоян (Арманистон), 22:00
- -57 кг: Хўжаназар Нортожиев — Хусравхон Раҳимов (Тожикистон), 22:45
- -80 кг: Жавоҳир Умматалиев — Арлен Лопес Кардона (Куба), 00:00
- -92 кг: Тўрабек Хабибуллаев — Алфонсо Домингес (Озарбайжон), 00:30
Ярим финал жанглари Тошкент вақти билан биринчи дастур 17:00 да, иккинчи дастур эса 22:00 да бошланади. Терма жамоамизнинг вакиллари бугунги кун натижасида финалга йўл олишга ҳаракат қилади.
