Сирдарёда 1500 МВт қувватли иссиқлик электр станциясида кузатилган носозлик сабабли айрим ҳудудларда электр вақтинча ўчиши мумкин. Бу ҳақда Энергетика вазирлиги хабар қилди.
Қайд этилишича, Саудия Арабистонининг ACWA Power компанияси томонидан фойдаланишга топширилган ушбу станциясининг 2-сонли газ турбинасида ротор носозлиги кузатилган. Япониянинг Mitsubishi компаниясида янги ротор тайёрланиб, махсус рейс билан 8 декабрь куни Тошкент халқаро аэропортига олиб келинди.
Оғирлиги 114 тонна бўлган қурилма аэропортдан электр станцияси майдонига етказилган. Уни ўрнатиш ва синов-созлаш ишлари тахминан бир ой вақт талаб қилади. Бу вақтда қувватларни қоплаш мақсадида қўшимча захирадаги ва янги ишга туширилаётган блоклардан фойдаланилмоқда.
Ҳозирги кунда ҳаво булутли бўлаётгани ва кунлар қисқалиги ҳисобидан қуёш фотоэлектр станциялари орқали электр олиш сусайган. Истеъмол балансини тартибга солиш мақсадида айрим ҳудудларнинг электр таъминотида асосан истеъмол ортган пайтлар, яъни 17:00-21:00 лар оралиғида қисқа муддатли узилишлар кузатилиши мумкин.
Бунга зарурат туғилса, истеъмолчилар олдиндан хабардор қилиниши таъкидланди.
Аввалроқ Ғиждувон ҳокими электр таъминотидаги узилишлар учун аҳолидан узр сўрагани хабар қилинганди. Фарҳод Умаров электр энергиясида айрим бир муаммолар борлигини айтиб ўтган.
Бошқа бир ҳолатда эса, 2025-йилнинг 4 ноябрь куни тоғли ҳудудларда, жумладан, Тошкент шаҳрида ёғган биринчи қор сабаб пойтахтнинг Юнусобод туманида электр энергиясида узилишлар кузатилгани юзасидан изоҳ берилган.
Бу ҳақда журналист Муҳрим Аъзамхўжаев маълум қилиб, “Юнусободда энергоавария бўлди-ёв. Ҳатто мобил интернет осилиб қолди”, деб ёзган бўлса, журналист Қобил Хидиров “Қишнинг биринчи қурбони — Юнусобод”, дея киноя қилган.
