Шавкат Мирзиёев 5 декабрь куни янги энергетика қувватлари ва инфратузилма объектларини ишга тушириш ҳамда навбатдагиларининг қурилишини бошлашга бағишланган тантанали маросимда қарийб 11 миллиард долларлик 42 та янги қувват ва инфратузилма объектларини ишга туширди, яна 21 та янги лойиҳа қурилишига старт берди.
Қорақалпоғистон, Бухоро, Қашқадарё ва Тошкент вилоятларида умумий қиймати 3,3 миллиард долларга тенг жами 3 500 мегаваттли 16 та қуёш, шамол, иссиқлик ва гидро электростансиялари шулар жумласидан. Тўлиқ қувватга чиққач, улар йилига 15 миллиард киловатт-соат электр энергияси ишлаб чиқаради. Натижада келгуси йилда “яшил” энергия ишлаб чиқариш ҳажми 23 миллиард киловатт-соатга етади. Ушбу қувватлар Ўзбекистон аҳолисининг йиллик электр энергия истеъмоли тўлиқ қопланишига хизмат қилади.
Тоза энергия ҳисобига табиий газ сарфи салкам 7 миллиард куб метрга камаяди. Атмосферага 11 миллион тонна зарарли моддалар чиқишининг олди олинади.
“Биз бугун ишга тушираётган барча лойиҳалар иқтисодий ўсишни таъминлаб, келажак авлодларимиз учун янги имкониятлар эшигини очади. Бундай жадал ҳаракатларимиз ва ташаббусларимиз билан биз янгича моделдаги замонавий энергетика тизимини албатта тўлиқ барпо этамиз, дея таъкидлади президент.
Президент матбуот хизматининг хабар қилишича, тадбирда Бирлашган Араб Амирликлари энергетика ва инфратузилма вазири Суҳайл ал-Мазруий, Туркия Республикаси энергетика ва табиий ресурслар вазири Алпарслан Bayraktar ва Озарбайжон Республикаси энергетика вазири Парвиз Шаҳбозов, Қирғиз Республикаси энергетика вазири Таалайбек Ибраев, шунингдек, Жаҳон банки, Европа тикланиш ва тараққиёт банки, Осиё тараққиёт банки, Осиё инфратузилмавий инвестициялар банки, Ислом тараққиёт банки ва бошқа молия институтлари, ACWA Power (Саудия Арабистони), Aksa Enerji, Cengiz Enerji (Туркия), Masdar (БАА), China Energy, Datang, Sinoma, Poly, CNTIC, Eagle Rise (Хитой), EDF, Voltalia, TotalEnergies (Франция), Siemens Energy (Германия) ва Nebras Power (Қатар) вакиллари ҳам қатнашди.
Фойдаланишга топширилаётган лойиҳалар орасида 1 минг 245 мегаваттли 10 та энергия сақлаш тизими ҳам бор. Бу энергия энг кўп истеъмол қилинадиган тиғиз вақтларда қўшимча 1,5 миллиард киловатт-соат электр энергиясини тармоққа узатиш имконини беради. Қўшимча равишда ишга туширилаётган 11 та йирик подстансия ва 420 километр юқори кучланишли тармоқлар тизимнинг барқарор ишлашига хизмат қилади.
Янги ташкил этилган йилига 15 мингта трансформатор ишлаб чиқарадиган “Ангрен Энерго” ҳамда 155 та гидро-агрегат тайёрлаб берадиган Uzhydropower корхоналари иқтисодиётга муҳим ҳисса қўшади. Давлат раҳбари маросимдаги нутқида ушбу тарихий воқеа Ўзбекистоннинг барқарор ривожланиши йўлидаги яна бир амалий қадам бўлишига ишонч билдирди.
Шавкат Мирзиёев Ўзбекистонга катта сармоя киритаётган ва энг илғор технологияларни олиб келаётган ҳамкор мамлакатларга миннатдорлик билдирди.
