Ўзбекистон миллий терма жамоаси бош мураббийи Фабио Каннаваро ноябрь ойида Бирлашган Араб Амирликларида ўтказилган “Al Ain International Cup” халқаро кубоги натижалари юзасидан ўз фикрларини билдириб ўтди.
Каннаварога кўра, терма жамоанинг асосий мақсади — 2026-йилги Жаҳон чемпионатига тўлиқ тайёргарлик билан етиб бориш.
“Бизнинг олдимизда катта вазифа турибди — 2026-йилги Жаҳон чемпионатига пухта тайёрланган ҳолда бориш. БААдаги турнирда ғолиб чиққан жамоамдан фахрланаман. FIFA рейтингида биздан юқорироқда турган Миср ва Эрон устидан қозонилган ғалабалар биз учун муҳим тажриба бўлди. Биз тўғри йўлдамиз. Ҳар куни фидойилик билан ишлашни давом эттиришимиз керак. Фақат шундагина барқарор, мустаҳкам жамоа тизимини шакллантира оламиз. Биз — бир жамоамиз. Ўзбекистон халқи, келинг, биргаликда орзу қилайлик”, дея фикр билдирди Фабио Каннаваро.
Маълумот учун, Ўзбекистон терма жамоаси ноябрь ойидаги FIFA йиғини доирасида БААда ўртоқлик турнирида иштирок этди. Жамоа мусобақанинг ярим финалида Мисрдан 2:0 ҳисобида устун келган бўлса, финалда Эронни мағлуб этди (асосий вақт — 0:0, пенальтилар серияси — 4:3).
