Исроил ҳужумидан кейин Ғазодаги ўликхонада тирик топилган 12 ёшли Рағд ал-Ассар ўз ҳикояси билан бўлишди. Қиз 2024 йилда “ҳалок бўлган” деб эълон қилинган ва саккиз соат давомида моргда ҳушсиз ётган. Бу ҳақда Al Jazeera хабар берди.
“Биз бошқалар каби уйда ўтирган эдик, тўсатдан устимизга ўқлар, самолёт ва дронлар ёғила бошлади”, деди жабрланувчи қиз.
Қизнинг тириклигини моргда ўғлини қидираётган эркак пайқаган. У ўликхонада қизнинг бармоқлари ҳаракатланаётганини кўрган.
“Мен икки ҳафта комада бўлдим ва уйғонганимда, уйдагилар мени ўликхона музлатгичига қўйишганини айтишди”, деди у.
Ал-Ассарнинг икки синглиси 2024 йил 8 июндаги ҳужумда ҳалок бўлган, унинг бошқа оила аъзолари ҳам уруш оқибатида жароҳатланган.
“Бутун оилам жароҳат олди, икки синглим шаҳид бўлди. Катта опамнинг аҳволи меникидан ёмонроқ. Унинг бир кўзи кўрмайди, куйишлар, чуқур яралар ва ошқозон билан боғлиқ муаммолар бор”, деди ал-Ассар.
Унинг ҳикояси БМТ экспертлари “геноцид” деб атаган Исроилнинг Ғазога қарши урушидан келиб чиқаётган кўплаб воқеалардан биридир. Ташкилотнинг Болалар жамғармаси маълумотларига кўра, Исроилнинг қирғоқбўйи Фаластин ҳудудига ҳужумлари оқибатида 64 мингга яқин бола “ҳалок бўлган ёки майиб бўлган”.
Исроилнинг Ғазога қарши уруши 2023 йил октябрь ойидан бери камида 69 187 фаластинликнинг ҳалок бўлишига ва 170 703 нафарининг яраланишига олиб келган. Ал-Ассарнинг отаси Муҳаммад унинг уйига ҳужум қилинганида ишда эди. Қариндоши қўнғироқ қилиб, воқеани айтиб берган.
“Уйимга ҳужум қилингани ҳақида хабар келди. Уйда эмас, ишда эдим. Нима бўлганини билиш учун ишдан шифохонага шошилдим. Сўнг вайроналар остидан ал-Ассарни қидириш учун уйга бордик. Унинг дарагини топмадик”, деди у.
Қизини топгач, Муҳаммад ҳужум унинг руҳий ҳолатини бутунлай ўзгартириб юборганини сезган.
“Бу ҳодиса унинг руҳиятини ўзгартириб юборди, у бошқа одам бўлиб қолди. Баъзан кўчада кетаётиб ҳушидан кетиб, йиқилиб қолади”, дейди у.
Ал-Ассарнинг Al Jazeera телеканалига айтишича, у ҳужум кунини ҳар сафар эслаганда қўрқинчли тушлар ва хавотирдан азият чекади.
“Мен эслашни ёқтирмайман, уруш овозларини эшитишни истамайман ва хотираларни эслатувчи нарсалардан қочаман. Портлаш ёки самолёт овозини эшитсам, қўрқаман”, дейди у.
Исроилнинг Ғазо бўйлаб икки йиллик бомбардимонлари кўплаб соғлиқни сақлаш муассасаларини вайрон қилди ва юзлаб шифокорларни ўлдирди. Ўтган ойда ҲАМАС ва Исроил ўт очишни тўхтатишга келишган бўлса-да, Исроил анклавга ҳужумларни давом эттирмоқда ва 10 октябрда сулҳ бошланганидан бери камида 260 киши ҳалок бўлган.
