Франция терма жамоаси 2026-йилги Жаҳон чемпионати саралаш босқичининг бешинчи туридан ўрин олган баҳсда Украина жамоасини 4:0 ҳисобида мағлуб этди ва турнирнинг финал босқичига йўлланмани қўлга киритди. Париждаги “Парк де-Пренс” стадионида кечган учрашувда Килиан Мбаппе (55 ва 83-дақиқалар), Майкл Олисе (76) ва Уго Экитике (88) ўз ҳисобига гол ёздириб қўйди.
Шу тариқа, саралаш босқичи якунланишига 1 тур қолганда Франция терма жамоаси 13 очко билан “Д” гуруҳида биринчи ўринни эгаллаган ҳолда мундиал иштирокчисига айланди. Иккинчи поғонада Исландия (7 очко), ундан кейин Украина (7) ва Озарбайжон (1) жамоалари жойлашган. Сўнгги тур 16 ноябрь куни ўтказилади: Франция сафарда Озарбайжон билан, Украина эса Исландия билан ўйнайди.
Франция терма жамоаси Жаҳон чемпионатига йўлланмани қўлга киритган 29-жамоа бўлди. Олдинроқ Мексика, АҚШ, Канада (барчаси – мезбонлар), Япония, Эрон, Жанубий Корея, Иордания, Австралия, Ўзбекистон, Янги Зеландия, Аргентина, Эквадор, Бразилия, Колумбия, Уругвай, Парагвай, Марокаш, Тунис, Миср, Жазоир, Гана, Кабо-Верде, Жанубий Африка Республикаси, Қатар, Англия, Саудия Арабистони, Сенегал ва Кот-д’Ивуар терма жамоалари ҳам финал босқич чиптасини қўлга киритганди.
Маълумот учун, Франция жамоаси Жаҳон чемпионатида икки марта ғолиб чиққан (1998, 2018), икки марта кумуш (2006, 2022) ва икки марта бронза (1958, 1986) медалларини қўлга киритган.
2026-йилги Жаҳон чемпионатида биринчи марта 48 та терма жамоа иштирок этади. Турнир 11 июнь – 19 июль кунлари бўлиб ўтади. Мундиал гуруҳлар босқичига қуръа ташлаш маросими 2025 йил 5 декабрда Вашингтонда ўтказилади.
