Саудия Арабистони футбол раҳбарияти Лионель Мессининг мамлакат клубларидан бирида қисқа муддатга ўйнаш ҳақидаги таклифини рад этди. Бу ҳақда RMC Sport нашри хабар берди.
Манбага кўра, аргентиналик футболчи АҚШнинг MLS лигасидаги танаффус вақтида жисмоний ҳолатини сақлаб туриш мақсадида Саудия Арабистони жамоаларидан бирига ўтмоқчи бўлган. Бироқ маҳаллий раҳбарият Мессининг атиги тўрт ойга келиб, миллий чемпионатда ўйнаш истагига рад жавобини берган.
Эслатиб ўтамиз, 23 октябрь куни “Интер Майами” Месси билан шартномани 2028 йил декабригача узайтирганини эълон қилган эди.
Аввалроқ Лионель Месси 2026-йилги Жаҳон чемпионатида иштирок этиш ниятида эканини билдирган, аммо у якуний қарорни кейинроқ, ўзининг жисмоний ҳолатига қараб қабул қилишини айтган.
38 ёшли Месси 2023-йилдан бери “Интер Майами” сафида тўп суради. У фаолияти давомида “Барселона” ва “Пари Сен-Жермен” клубларида ҳам ўйнаган. Аргентиналик юлдуз саккиз карра “Олтин тўп” соҳиби бўлиб, миллий терма жамоаси билан Жаҳон чемпионати (2022), Америка Кубоги (2021, 2024), Финалиссима (2022) ва Олимпиада (2008) ғолиблигини қўлга киритган.
2026-йилги Жаҳон чемпионати 11 июндан 19 июлгача АҚШ, Канада ва Мексикада бўлиб ўтади.
