Аргентина терма жамоаси ҳужумчиси Лионель Месси Жаҳон чемпионатлари тарихида уч марта финалга қадар етиб борган олтинчи футболчига айланди. Бу ҳақда Mundo Deportivo нашри хабар бермоқда.
Аргентиналиклар ЖЧ-2026 яримфиналида Англия устидан 2:1 ҳисобида ғалаба қозониб, финал йўлланмасига эга чиқди. Ушбу учрашувда Месси иккита голли узатмани амалга оширди ва ўйиннинг энг яхши футболчиси деб топилди.
Қайд этиш жоизки, Месси бундан аввал ЖЧ—2022 даги финалда Францияга (3:3, пенальтилар сериясида 4:2) ҳамда ЖЧ-2014 ҳал қилувчи баҳсида Германияга (0:1) қарши майдонга тушган эди.
Бунгача мундиал финалларида уч марта қатнашиш бразилияликлар — Кафу, Пеле ва Роналду, шунингдек, германиялик Пьер Литтбарски ва Лотар Маттеусга насиб қилган. Аммо уларнинг орасида фақатгина Кафу барча учта финалда бевосита майдонга тушган (Пеле, Роналду, Литтбарски ва Маттеус қайсидир финални захира ўриндиғида ўтказиб юборган).
Маълумот учун, ЖЧ-2026 финалида Аргентина Испания терма жамоасига қарши ўйнайди. Ҳал қилувчи баҳс 19 июль куни АҚШнинг Нью-Жерси шаҳридаги стадионда бўлиб ўтади. Учрашув Тошкент вақти билан 20 июлга ўтар кечаси соат 00:00 да бошланади.
