Наманган шаҳар ҳокими лавозимига Айюбхон Камолов тайинланди. Бу ҳақда “Дарё” мухбири Азизбек Абдувалиев хабар қилди.
Маълум бўлишича, унинг номзоди Наманган шаҳар кенгашининг навбатдан ташқари сессиясида тавсия этилган ва тасдиқланган. Бунгача у Марказий банк раисининг ўринбосари сифатида ишлаган.
Камолов Анваржон Отахўжаев ўрнига тайинланган. Собиқ ҳоким қилган жинояти учун депутатлик дахлсизлик ҳуқуқидан маҳрум қилиниб, қамоққа олинган.
Отахўжаев пойабзал ишлаб чиқарувчи масъулияти чекланган жамият раҳбари билан ўзаро тил бириктиргани аниқланганди. Улар қурилиш соҳасида тадбиркорлик фаолияти билан шуғулланмоқчи бўлган фуқародан шаҳар ҳудудидаги 35 сотих ер майдонида жойлашган маънан эскирган турар-жой бинолари ўрнига кўп қаватли уй барпо этиш ҳуқуқини олиб бериш ва молиялаштириш эвазига 60 минг АҚШ доллари талаб қилган.
Ўтказилган тезкор тадбирда дастлаб МЧЖ раҳбари сўралган пулни олган вақтида ашёвий далиллар билан ушланган. Шундан сўнг тезкор тадбир давом эттирилиб, шаҳар ҳокими ўзининг яна бир ишончли одами бўлган ҳокимликнинг девонхона мудири орқали МЧЖ раҳбаридан 60 минг АҚШ долларини олган вақтида унинг ноқонуний ҳаракатларига чек қўйилганди.
Давлат хавфсизлик хизматининг Наманган вилояти бошқармаси Тергов бўлими томонидан унга ва девонхона мудирига нисбатан Жиноят кодексининг 210-моддаси 3-қисми “а” банди билан, МЧЖ раҳбарига нисбатан эса Жиноят кодексининг 168-моддаси 4-қисми “а” банди ва 28, 211-моддаси 3-қисми “а” банди билан жиноят иши қўзғатилганди. Шаҳар ҳокимига нисбатан қамоқ эҳтиёт чораси қўлланилган.
Айюбхон Камолов 1971-йилда Наманган шаҳрида туғилган, 1993-йили Ленинград қишлоқ хўжалиги институти, 2001-йили Наманган муҳандислик-педагогика институтини тамомлаган
У меҳнат фаолиятини 1993-йили Наманган вилоят Истиқболни белгилаш ва статистика бошқармасида бошлаган. 1994—2017-йилларда банк-молия тизимида турли лавозимларда фаолият олиб борган.
2017—2019-йилларда Вазирлар Маҳкамаси ҳузуридаги тадбиркорлик фаолиятини ривожлантиришни қўллаб-қувватлаш давлат жамғармаси ижрочи директори вазифасида ишлаган. 2019—2020-йилларда Наманган вилояти ҳокимининг биринчи ўринбосари бўлган, сўнг Вазирлар Маҳкамасининг Макроиқтисодий таҳлил, молия-банк тизими, давлат активларини бошқариш, рақобатни бошқариш, тадбиркорликни қўллаб-қувватлаш ва камбағалликни қисқартириш масалалари котибиятини бошқарган.
Айюбхон Камолов 2020 йил декабридан бери Марказий банк раисининг ўринбосари сифатида ишлаб келаётганди.
