Ҳиндистон Россиядан нефть импортини кескин камайтиришга киришди. Бу ҳақда манбаларга таяниб, Reuters хабар берди.
Қарор АҚШ томонидан Россиянинг йирик нефть компаниялари — “Лукоил” ва “Роснефт”га нисбатан янги санкциялар жорий этилгач, қабул қилинмоқда. Мазкур чоралар Москванинг Украинадаги урушни молиялаштириш имкониятларини қисқартиришга қаратилган.
Манбаларга кўра, Ҳиндистоннинг энг йирик хусусий нефть импортчиси — Reliance Industries Россиядан нефть олиб келишни қисқартиради ёки бутунлай тўхтатади. Компания вакили бу борада қуйидагича изоҳ берди:
“Россия нефтини импорт қилиш ҳажми қайта кўриб чиқилмоқда. Reliance тўлиқ равишда Ҳиндистон ҳукумати кўрсатмаларига амал қилади”.
Ҳиндистон нефть вазирлиги бу масалада ҳозирча расмий изоҳ бермаган. Давлат нефть компаниялари ҳам ўз савдо ҳужжатларини кўздан кечирмоқда. Улар АҚШ санкцияларидан кейин Россиянинг “Роснефт” ва “Лукоил” компанияларидан бевосита етказиб бериладиган нефтни харид қилмасликни режалаштирмоқда.
АҚШ президенти Дональд Трамп 22 октябрь куни Россияга қарши янги санкциялар пакетини эълон қилган. Бу — унинг иккинчи президентлик муддатида Украинага оид илк санкциялар бўлиб, Россия президенти Владимир Путин билан муносабатлардаги кескинлик фонида жорий этилган.
АҚШ Молия вазирлиги компанияларга 21 ноябргача Россия нефть ишлаб чиқарувчилари билан битимларни якунлаш учун муддат берган. Манбаларга кўра, импорт ҳажми кескин қисқаради, бироқ санкциялар кучга киргунча, айрим нефть партиялари бозорга чиқиши мумкин.
Ҳиндистоннинг йирик давлат компаниялари — Indian Oil Corp, Bharat Petroleum, Hindustan Petroleum ва Mangalore Refinery and Petrochemical — 21 ноябрдан кейин келадиган Россия нефти юк ҳужжатларини синчиклаб текшираётгани айтилмоқда. Маълум бўлишича, Ҳиндистон давлат компаниялари одатда Россия нефтини тўғридан тўғри “Роснефт” ёки “Лукоил”дан эмас, балки воситачилар орқали харид қилади.
Россия 2022 йилда Украинага бостириб киргач, Ҳиндистон Москванинг энг йирик нефть харидорига айланган. 2025 йилнинг дастлабки тўққиз ойида мамлакат кунига ўртача 1,7 миллион баррел Россия нефтини импорт қилган.
