Ўзбекистон миллий терма жамоаси ва “Манчестер Сити” ҳимоячиси Абдуқодир Ҳусановнинг сафга қайтиш санаси маълум бўлди. Standart нашрининг хабар беришича, футболчи Англия Премьер Лигасининг 8-туридан ўрин олган “Эвертон”га қарши баҳсда майдонга тушиши мумкин. Учрашув 18 октябрь санасига белгиланган.
Ўзбекистонлик ҳимоячи АПЛнинг 5-туридаги “Арсенал”га қарши ўйиннинг биринчи бўлими охирида жароҳат олган эди. Шундан сўнг, бош мураббий Пеп Гвардиола Ҳусанов камида учта ўйинни — “Ҳаддерсфилд” (Карабао Кубоги), “Бёрнли” (АПЛ) ва “Монако” (Чемпионлар Лигаси)га қарши беллашувларни ўтказиб юборишини маълум қилган. Бироқ футболчининг жароҳати кутилганидан жиддийроқ бўлиб чиқди. Сабаби ҳимоячи жароҳат ортидан “шаҳарликлар”нинг 4 та ўйини (“Брентфорд”) ҳамда Ўзбекистон терма жамоасининг октябрь ойидаги йиғинини ўтказиб юборди.
Шунингдек, “Эвертон”га қарши ўйинда “Манчестер Сити” сафида мисрлик футболчи Омар Мармуш ҳам сафга қайтиши кутилмоқда.
Маълумот учун, Абдуқодир Ҳусанов жорий мавсум “Манчестер Сити” таркибида жами 5 та учрашувда майдонга тушган. Transfermarkt портали унга 35 миллион евро қиймат белгилаган. Футболчининг клуб билан тузган шартномаси 2029 йил ёзига қадар амал қилади.
Эслатиб ўтамиз, АПЛнинг 7-туридан сўнг “Манчестер Сити” 13 очко билан мусобақа жадвалида 5-ўринни эгаллаб турибди.
