Зеленский Путинга Қозоғистонда учрашишни таклиф қилди (видео)

Украина президенти Владимир Зеленский россиялик ҳамкасби Владимир Путин билан Қозоғистонда учрашишга тайёрлигини айтди. Бу ҳақда сиёсатчи FoxNews телеканалига берган интервьюсида маʻлум қилди.

Зеленскийнинг сўзларига кўра, Украина учрашув майдонлари сифатида Туркия, Саудия Арабистони, Қатар, нейтрал Европа давлатлари Австрия ва Швейцарияни таклиф қилган.

“Агар хоҳласангиз, масалан, Қозоғистонда”, деган Зеленский.

Маʻлумот ўрнида, 23 сентябрь куни Қозоғистон президенти Қосим-Жўмарт Тўқаев БМТ Бош Ассамблеяси доирасида Зеленский билан учрашди. Қозоғистон раҳбари Украинадаги можарони ҳал қилиш бўйича дипломатик саъй-ҳаракатларни давом эттириш тарафдори эканини айтди. Зеленскийнинг айтишича, улар савдо-иқтисодий ҳамкорлик ва Қозоғистон бизнесининг Украинани тиклашга қизиқишини ҳам муҳокама қилган.

“Қозоғистонга Украинанинг суверенитети ва ҳудудий яхлитлигини қўллаб-қувватлагани учун миннатдорчилик билдираман”, деган Украина раҳбари.

Путин учрашувни Москвада ўтказишни таклиф қилганди, Зеленский Украинага ҳужум қилаётган мамлакат пойтахтига бормаслигини таъкидлаган. Сиёсатчи бунинг ўрнига Киевда учрашишни илгари сурганди.