Президентнинг суд-экспертлик фаолияти рақамлаштиришга қаратилган қарори қабул қилинди. Бу ҳақда Адлия вазирлиги хабар қилди.
Фаолиятни ривожлантиришнинг асосий мақсадларидан бири этиб рақамлаштириш ва сунъий интеллектдан фойдаланиш орқали тадқиқотларнинг тезкорлиги, холислиги ва тўлиқлигини таъминлаш белгиланди.
Шунингдек, суд-экспертиза ташкилотлари ва экспертиза тайинловчи органларнинг ахборот тизимларини интеграция қилиш орқали электрон ҳужжатлар алмашинувини 100 фоизга етказиш режалаштирилган.
Қарорга кўра, судлар, терговга қадар текширув, суриштирув, дастлабки тергов ва маъмурий ҳуқуқбузарликлар тўғрисидаги ишларни кўриб чиқувчи органлар билан “Э-экспертиза” ахборот тизими суд-экспертиза ташкилотлари фаолиятига тўлиқ жорий этилади. Ушбу тизим электрон ҳужжатлар алмашинувини таъминлайди.
“Э-экспертиза” платформаси ва экспертиза тайинловчи органларнинг ахборот тизимлари ўртасида электрон ахборотлар алмашинуви 2026 йил 1 январдан республика даражасидаги экспертиза тайинловчи органларда, келаси йилнинг 1 июнидан Қорақалпоғистон Республикаси, вилоятлар ва Тошкент шаҳри даражасида, 2026 йил 1 сентябрдан эса туман (шаҳар) даражасидаги экспертиза тайинловчи органларда йўлга қўйилади.
