Тарихда илк бор олтин нархи бир унсия учун 3 500 доллардан ошиб, апрел ойида қайд этилган рекордни янгилади. Бу ҳақда Financial Times хабар берди.
Осиё бозорида эрталабки савдолар чоғида олтиннинг спот нархи 0,9 фоизга ошиб, бир троя унсияси (тахминан 31 грамм) 3 508,70 долларга баҳоланди, кейин эса 3 497 долларгача пасайди. Таҳлилчилар фикрича, инвесторлар олтинни инфляция ва глобал иқтисодий беқарорликдан ҳимояланиш воситаси сифатида кўраётгани сабаб талаб ошган.
Нархларнинг кўтарилиши АҚШ Федерал захира тизими мустақиллигига оид хавотирлар фонида юз бермоқда. Доналд Трамп Федерал захира тизими раиси Жей Пауеллга босим ўтказгани ва губернатор Лиза Кукни лавозимидан олишга урингани инвесторларни ташвишга солган. Уларнинг фикрича, сиёсий босим туфайли фоиз ставкалари пасайса, инфляция кучайиши мумкин.
Йил бошидан бери олтин нархи 30 фоиздан кўпроққа ошди. Бунга заиф иқтисодий кўрсаткичлар, геосиёсий таранглик ва АҚШ Федерал захира тизими мустақиллигига таҳдидлар сабаб бўлди. Ўз навбатида, кумуш ҳам қимматлашмоқда: йил бошидан буён 40 фоиздан ортиб, 2011 йилдан бери илк бор бир унсияси 40 доллардан юқори баҳоланди. Бунга металлнинг тоза энергия лойиҳаларида — қуёш панеллари ва аккумуляторларда — қўлланилиши ортаётгани сабаб бўлмоқда.
Прогнозларга кўра, 2026 йил ўрталарига келиб олтиннинг спот нархлар бир унсия учун 4 000 долларга етиши мумкин. Олтин 2023 йил бошидан буён деярли икки баравар қимматлашган, чунки марказий банклар захираларини кенгайтирган ва инвесторлар инфляцияга қарши ҳимоя изламоқда.
2024 йил олтин еврони ортда қолдириб, доллардан кейин дунёда иккинчи энг кенг тарқалган марказий банк захира активига айланди. Ҳозир у жаҳон расмий захираларининг 20 фоизини ташкил этади. Жаҳон олтин кенгашига кўра, энг йирик харидорлар Ҳиндистон, Хитой, Туркия ва Полша бўлган.
Маълумот учун, спот-олтин ҳозирги кунда олтинни дарҳол етказиб бериш шарти билан сотиб олиш ёки сотиш нархи. Олтин фючерслари эса келажакда олтинни олдиндан келишилган нархда сотиб олиш ёки сотиш бўйича шартнома.
