Украина ва Россия президентлари иштирокидаги иккинчи учрашув можарони ҳал этиш бўйича келишувга эришиш учун имконият бўлиши мумкин. Бу ҳақда АҚШ президенти Дональд Трамп Fox News радиостанцияси эфирида айтиб ўтган.
Унинг сўзларига кўра, Россия президенти Владимир Путин билан бўлажак музокаралар Украина президенти Владимир Зеленский иштирокидаги эҳтимолий иккинчи учрашувга тайёргарлик бўлади.
Трампнинг таъкидлашича, иккинчи учрашувда Украинадаги можарони ҳал этиш бўйича келишувга эришиш масаласи муҳокама қилинади.
Шунингдек, у Россия раҳбари келишувга рози бўлиши, санкциялар таҳдиди эса Москвани учрашув ўтказишга ундаган бўлиши мумкинлиги ҳақида фикр билдирган.
Бундан ташқари Трамп Путин ва Зеленский иштирокидаги иккинчи учрашувни ўтказиш учун учта эҳтимолий жойни кўриб чиқаётганини қўшимча қилган.
Путин ва Трампнинг учрашуви 15 август куни Аляскада ўтказилиши кутилмоқда. Икки давлат раҳбарлари музокараларининг асосий мавзуси Украинадаги можарони ҳал этиш бўлади. Хусусан, президентлар ҳудудларни алмашиш ва Киевнинг НАТОга аъзо бўлишдан воз кечиши ҳақида гаплашишлари мумкин
АҚШ президенти Украинадаги вазиятни тартибга солиш муҳокамаси доирасида “ҳудудлар алмашинуви” масаласи кўтарилаётганини таъкидлаган. Шунингдек, у йўқотилган ҳудудларнинг бир қисмини Киевга қайтаришга уриниб кўришини билдирган.
Бундан аввал Украина президенти Владимир Зеленский ўзи ҳамда Россия ва АҚШ президентлари Владимир Путин ва Дональд Трамп билан уч томонлама учрашув режалаштирилганини, бироқ музокаралар санаси ҳали белгиланмаганини маълум қилди.
