Хитой Халқ Республикаси раиси Си Цзиньпин Россия Федерацияси президенти Владимир Путинга Қозоғистонга ташрифи ҳақида маълумот берди. Бу ҳақда Россия Федерацияси президенти ёрдамчиси Юрий Ушаков маълум қилди.
Ма`лум қилинишича, 19 июнь куни Россия президенти Владимир Путин ва Хитой Халқ Республикаси (ХХР) раиси Си Цзиньпин телефон орқали суҳбатлашган. Муҳокаманинг асосий мавзуси Яқин Шарқдаги кескинлашган вазият бўлган.
Ушаковнинг таъкидлашича, Яқин Шарқдаги вазиятга нисбатан иккала томон ҳам бир хил ёндашувга эга: улар Исроилнинг БМТ Низоми ва халқаро ҳуқуқнинг бошқа меъёрларини бузаётган ҳаракатларини қатъий қоралайди.
“Ҳам Москва, ҳам Пекин мавжуд вазият ва Эрон ядро дастури билан боғлиқ масалаларни куч ишлатиш йўли билан ҳал қилиб бўлмаслигидан келиб чиқади. Бу масалани фақат сиёсий-дипломатик усуллар билан ҳал этиш керак”, - дейди Ушаков.
Путин Сига “Исроил-Эрон қарама-қаршилиги контекстидаги асосий ўйинчилар” билан ўтказган сўнгги халқаро телефон суҳбатлари ҳақида маълумот берган. Шунингдек, Москванинг мумкин бўлган воситачилик саъй-ҳаракатларини амалга оширишга тайёрлигини тасдиқлаган.
Ма`лум қилинишича, Си Цзиньпин Путинга 17-18 июнь кунлари бўлиб ўтган “Хитой - Марказий Осиё” иккинчи саммити доирасида Қозоғистонга сафари ҳақида батафсил маълумот берган. Томонлар Россия Федерацияси ва ХХР ўртасидаги кенг қамровли стратегик шериклик муносабатлари руҳида Марказий Осиё минтақаси ъҳақиқий барқарорлик, иқтисодий фаровонлик ва ўзаро манфаатли ҳамкорлик намунасига айланиши” учун ўзаро ёндашувларни мувофиқлаштириш фойдали бўлишини таъкидлаган.
“ХХР раисидан олган маълумотлар биз учун жуда муҳим ва фойдали бўлди. Айниқса, Россия - Марказий Осиё форматидаги иккинчи олий даражадаги учрашувга ўзимиз тайёргарлик кўраётганимиз сабабли. Бу учрашув 10 октябрь куни Душанбеда бўлиб ўтиши режалаштирилган”, - деди Россия президенти ёрдамчиси.
17 июнь куни Остона шаҳрида “Марказий Осиё – Хитой” иккинчи саммити бўлиб ўтди. Саммит доирасида долзарб ва стратегик аҳамиятга эга 15 та ҳужжат имзоланди. Хитой 2025 йилда Марказий Осиёнинг барча бешта давлатига 1,5 миллиард юан (207 миллион доллардан ортиқ) миқдорида беғараз грант ажратишга тайёр эканлигини билдирди.
