Леверкузеннинг “Байер” клуби бош мураббийи Хаби Алонсо “Реал” билан 2028 йилга қадар мўлжалланган шартнома имзолади. Бу ҳақда журналист Фабрицио Романо хабар берган.
Манбага кўра, испаниялик мутахассис “Реал”даги фаолиятини 15 июндан 13 июлгача АҚШда бўлиб ўтадиган Клублар ўртасидаги Жаҳон чемпионатида бошлайди. Мадридликлар Алонсо жамоа сафига эртароқ келиши борасида немис клуби билан музокара олиб борган ва келишувга эришган.
Эслатиб ўтамиз, ўтган ҳафта “Байер” матбуот хизмати Алонсо жорий мавсум якунида жамоани тарк этишини расман эълон қилганди.
Хаби Алонсо 2022 йилдан бери “Байер” бош мураббийи сифатида ишлаб келмоқда. Унинг қўл остида жамоа Германия чемпионлиги ҳамда мамлакат Кубогини қўлга киритди.
Маълумот учун, “қироллик клуби” ёмон натижалар фонида италиялик мутахассис Карло Анчелотти билан шартномани бекор қилиш арафасида турибди. “Реал” жорий мавсум ҳеч қандай соврин қўлга киритмади: Жамоа Испания Суперкубоги финалида ҳамда мамлакат кубогида “Барселона”га имкониятни бой берган бўлса, Чемпионлар Лигасида “Арсенал”га мағлуб бўлди. Ла Лигада эса биринчи ўриндаги жамоадан 7 очко ортда қолмоқда.
