АҚШ билан келишувдан сўнг Россия энергетика тизимига зарба беришга вақтинчалик мораторий қўлланадиган объектлари рўйхатини тадқим этди. Мораторий бузилган тақдирда, Россия ўзини унга риоя қилиш мажбуриятларидан озод деб ҳисоблашини маълум қилди.
Рўйхатга қуйидагилар киритилган:
- нефтни қайта ишлаш корхоналари;
- нефть, газ қувурлари ва омборхоналар, шу жумладан, насос станциялари;
- электр энергиясини ишлаб чиқарувчи ва узатувчи инфратузилма, шу жумладан, электр станциялари, подстанциялар, трансформаторлар ва тақсимлагичлар;
- атом электр станциялари;
- гидроэлектростанциялар тўғонлари.
Вақтинчалик мораторий 2025 йил 18 мартдан бошлаб 30 кун давомида амал қилади ва томонларнинг келишувига кўра узайтирилиши мумкин. Қарор Москва ва Вашингтон делегацияларининг Ар-Риёдда (Саудия Арабистони) бўлиб ўтган музокаралари якунлари бўйича қабул қилинган.
Улар 12 соат давом этган ва 24 март куни кечқурун якунланган. Худди шундай формулировка Ар-Риёдда бўлиб ўтган АҚШ-Украина музокаралари натижасида ҳам келишиб олинган. Хусусан, томонлар Қора денгизда хавфсиз кема қатновини таъминлашга келишган.
18 март куни Россия президенти Владимир Путин америкалик ҳамкасби Дональд Трамп билан бўлиб ўтган телефон орқали суҳбатда унинг Россия ва Украинанинг энергетика объектларига зарба беришдан вақтинчалик воз кечиш таклифини маъқуллаган эди.
Украина президенти Владимир Зеленский, ўз навбатида, энергетика объектларига зарбаларни ўзаро тўхтатишга рози бўлди. Шу билан бирга, у бундай объектларга ҳужумлар тикланса, Киев россияликларнинг зарбаларига муносиб жавоб беришини таъкидлади.
