Украина ташқи ишлар вазири Андрей Сибига урушнинг бир куни мамлакат иқтисодиёти учун тахминан 450 миллион долларга тушаётганини айтди. У бу ҳақда Польша халқаро ишлар институти (PISM) томонидан ташкил этилган “Стратегиc Арк” конференциясидаги нутқида маълум қилди.
Вазир ўз нутқида Украина Россия ҳужумини тўхтатиш ва урушни якунлаш учун барча имкониятларни ишга солаётганини таъкидлади.
“Биз ҳал қилувчи нуқтада, бурилиш палласида турибмиз. Вақт бизнинг фойдамизга ишлай бошлайдиган лаҳзага жуда яқинмиз”, деди ТИВ раҳбари.
Сибиганинг сўзларига кўра, Россия иқтисодиёти заифлашган бўлса-да, ҳали критик инқироз босқичига етиб келгани йўқ.
“Ҳа, улар жанг майдонида йўқотишларга учради, лекин у ерда (Россияда) яна бошқа нималардир содир бўлмоқда. Яқинда биз уларнинг ижтимоий тармоқларида маълум чекловларни пайқадик. Аҳоли томонидан Путинни қўллаб-қувватлаш даражасига оид баъзи фактларни кўряпмиз. Бу кўрсаткич камаймоқда. Биз у ерда содир бўлаётган воқеалар бўйича разведка маълумотлари, ҳамкорларимизнинг баҳоларига ҳам эгамиз. Шу сабабли босимимизни кучайтириш учун импулс мавжуд”, деди Сибига.
Вазир, шунингдек, жорий вазият тинчликка эришиш йўлидаги муҳим бурилиш нуқтаси бўлиши мумкинлигини таʻкидлади.
“Бу йил (2026 йил) тинчликка эришиш учун ҳал қилувчи йил бўлиши мумкин. Яна бир бор таъкидлайман, Украина учун урушнинг бир куни тахминан 450 миллион долларга тушади”, деди ТИВ раҳбари.
Сибига инсоний йўқотишлар Украина учун энг оғриқли нуқта эканини, украин аскарлари ҳозирда ўз қони эвазига нафақат ўз мамлакати, балки Европа тарихини ҳам ёзаётганини қайд этди.
“Биз бу урушни тугатмоқчимиз ва бунинг ягона йўли — Россияга турли воситалар билан босим ўтказишни кучайтиришдир”, деди Андрей Сибига.
Путин уруш якунига етаётганини айтди
Россия президенти Владимир Путин 9 май кунги чиқишида Украинадаги ҳарбий ҳаракатлар тез орада якунланиши мумкинлигига ишора қилди. Бироқ Ғарб экспертлари ва расмийлари бу баёнотларга шубҳа билан қарамоқда.
Хусусан, Американинг Урушни ўрганиш институти (ISW) таҳлилчилари Россиянинг можарони тўхтатиш ниятида эканини тасдиқловчи реал белгилар йўқлигини билдирди. Германия мудофаа вазири Борис Писториус эса Путиннинг сўзларини “ёлғон” деб атади. Вазирнинг фикрича, Россия президенти бундай баёнотлар орқали “ўз заифлигини яширишга уринаётгани”, чунки рус ҳарбийлари фронтда деярли муваффақиятга эришмаётганини таъкидлади.
