Самарқанд вилоятининг Жомбой туманида автобус ағдарилиши оқибатида бир киши вафот этгани ҳақида хабар берилган эди. Тумани тиббиёт бирлашмаси бош шифокорининг маълум қилишича, ундан ташқари 22 нафар аёл жароҳатланган.
ЙТҲ 11 февраль куни соат 7:00 лар атрофида “Самарқанд” маҳалласи ҳудудидан ўтувчи М-39 автомобиль йўлининг 1079-километрида содир бўлганди. Вилоят ИИБ йўл ҳаракати хавфсизлиги бошқармаси ахборотига кўра, автоҳалокатга автобус ҳайдовчиси Cobalt русумли транспорт воситасининг ҳолатини инобатга олмасдан тезликни меъёридан ошириб юборгани ва тормозни кескин равишда босгани сабаб бўлган.
Бош шифокор Тозагул Холиқованинг “Миллий” телеканалига маълум қилишича, шифохонага 23 нафар аёл ётқизилган, улардан бири воқеа жойида ҳалок бўлган. Аёлларнинг жароҳатлари оғир: 16 нафар йўловчи жарроҳлик бўлимига, икки нафар аёл реанимацияга ётқизилди. “Уларнинг аҳволи оғирроқ, реанимацияда даволаняпти”, деган шифокор.
ЙТҲга учраган туристик автобус Самарқанддан Тошкентга кетаётган бўлган. Терговнинг якуний хулосасига кўра жамоатчиликка қўшимча маълумот берилиши маълум қилинган.
Ўзбекистонда 2024 йилда 9364 та йўл-транспорт ҳодисаси содир бўлган. Бунинг оқибатида 2203 киши вафот этган, 8901 нафари тан жароҳати олган.
