Тошкентда 27 декабрга ўтар кечаси учта йўл-транспорт ҳодисаси содир бўлди.
Учтепа тумани ТҲАЙ кўчасида соат 00:40 ларда 25 ёшли ҳайдовчи Н.К. Tracker автомашинасини бошқариб кетаётиб, рул бошқарувини йўқотиб, йўлни ажратиб турувчи бетон тўсиққа ва бетон симёғочга урилган. Биринчи тез тиббий ёрдам кўрсатиш мақсадида ҳайдовчи шифохонага олиб кетилган.
Олмазор тумани Беруний кўчасида соат 00:45 ларда Malibu-2, Cobalt, BMW, Matiz русумли автомашиналар ўзаро тўқнашуви натижасида йўл-транспорт ҳодисаси содир бўлган. ЙТҲ натижасида жабрланган BMW’нинг 32 ёшли ҳайдовчиси Ф.А.га тез ёрдам ходимлари томонидан биринчи тез тиббий ёрдам кўрсатилган.
Мирзо Улуғбек тумани Олтинтепа кўчасида 20 ёшли ҳайдовчи Д.А. бошқарувидаги Nexia-3 ҳамда 45 ёшли ҳайдовчи бошқарувида бўлган Captiva тўқнашган. Nexia-3 ҳайдовчиси шифохонага олиб кетилган.
Ҳодиса юзасидан Тошкент шаҳар ИИББ ЙҲХБ масъул ходимлари томонидан суриштирув ишлари олиб борилмоқда.
