Самарқанд вилояти ҳокимлиги 2 дона қора рангли BYD Chazor Champion DM-i Flagship 120km автомобилини харид қилди. Бу давлат харидлари портали маълумотларида келтирилган.
Шартномалар Beni-Motors масъулияти чекланган жамият билан 7 октябрь куни тузилган бўлиб, автомобилларнинг умумий нархи 630 млн сўмни ташкил этади.
Автомобилларни сотиб олишга вилоят ҳокимининг 30 сентябрдаги 261-7-0-Ф/24 рақамли фармойиши асос қилиб олинган.
Фармойишда маблағ вилоят маҳаллий бюджетининг захира жамғармаси маблағлари ҳисобига сотиб олиниши белгиланган. Сотиб олинишдан мақсад вилоятга ташриф буюрган расмий делегацияларга сифатли хизмат кўрсатиш деб кўрсатилган. Бунинг учун вилоят ҳокимлиги Ишлар бошқармаси бошлиғи Н.Саидовнинг мурожаати, Иқтисодиёт ва молия бош бошқармасининг хулосаси ҳамда вилоят ҳокимининг биринчи ўринбосари Ф.Абиловнинг билдиргиси асос қилиб олинган.
“Дарё” мухбири ўрганиш давомида ушбу фармойиш Адлия вазирлигининг “Э-қарор” ягона электрон тизими платформасида яшириб қўйилганини аниқлади.
Шунингдек, ушбу ҳужжат мазмунида шахсга доир маълумотлар, васийлик ва ҳомийлик ёки амалдаги қонунчиликка мувофиқ бошқа турдаги фойдаланиши чекланган ахборот мавжудлиги кўрсатиб ўтилган бўлса-да, қарор матни “Шахсга доир маълумотлар тўғрисида”ги қонунга мос келмаслигини кўриш мумкин.
Бу эса қонунчиликка зид ҳисобланади.
Ваҳоланки, “Давлат ҳокимияти ва бошқаруви органлари фаолиятининг очиқлиги тўғрисида”ги қонуннинг 5-моддасига мувофиқ ушбу фармойиш ҳокимликнинг ўз расмий веб-сайтига жойлаштириладиган тегишли ахборот ҳисобланади. Бироқ ҳокимлик ҳужжатни ўз веб-сайтида ҳам эълон қилмаган.
Бундан ташқари, ҳокимлик шартномани тузишдан олдин давлат харидлари электрон тизимида камида бир иш куни давомида жамоатчилик муҳокамасидан ўтказиши лозим бўлса-да, ўтказмаган. Шундай бўлса-да, муҳокама ўтказилгани ҳақида баённома тузилиб, эътироз келиб тушмагани билдирилган.
Шартномаларнинг биттаси тузилган куннинг ўзида, иккинчиси эса икки кун ўтиб, 9 октябрь куни порталга жойлаштирилган. Бу эса президентининг 2024 йил 10 июлдаги “Давлат харидлари тизимини такомиллаштириш ва унда кичик тадбиркорлик субъектлари иштирокини рағбатлантириш чора-тадбирлари тўғрисида”ги қарорига зид ҳисобланади.
Нега янги автомобиль харидига оид фармойиш яшириб қўйилди?
Ҳокимлик нима сабабдан шартнома тузишдан олдин уни муҳокамадан ўтказиш учун давлат харидлари порталига жойлаштирмади?
“Дарё” шу ва мавзуга оид бошқа саволларга масъуллардан муносабат кутиб қолади.
Маълумот учун, ҳокимликнинг 13 та ижро ҳужжатлари бўйича жами 1 миллиард 655 миллион 761 минг сўм қарздорлиги мавжудлиги аниқланган.
