Тошкент шаҳрининг Чилонзор туманидаги ГЭСдан 2000 йилда туғилган йигитнинг жасади топилди. Бу ҳақда Бош прокуратура матбуот хизмати “Дарё” хабар берди.
Маълум қилинишича, 12 ноябрь куни фуқаро С.Х. 102 рақамига қўнғироқ қилиб, Чилонзор тумани, “Бешёғоч” МФЙ ҳудудидан оқиб ўтувчи “Анҳор” каналида рус миллатига мансуб эркак кишининг чўкиб кетганлиги бўйича хабар берган. Ушбу хабар асосида воқеа жойига чиқилиб, каналда чўкиб кетган шахсни топиш чоралари кўрилган ва ҳолат бўйича терговга қадар текширув ҳужжатлари тўпланган.
Бундан ташқари, 13 ноябрь куни Учтепа тумани, 24-мавзеда яшовчи И.Г. туман ИИО ФМБга ариза билан мурожаат қилиб, унда ўғли 2000 йилда туғилган А.Б. 11 ноябрь куни соат 15:30 ларда уйидан чиқиб кетиб бедарак йўқолганлигини айтиб, уни топишда ёрдам сўраган.
20 ноябрь куни соат 08:45 ларда Чилонзор тумани, Бешёғоч кўчасидаги ГЭСдан А.Б.нинг жасади топилган.
Ҳозирда А.Б.нинг мурдаси топилганлиги бўйича тўпланган терговга қадар текширув ҳужжатлари Учтепа туман прокуратурасига юборилди.
