Тошкент шаҳар Фавқулодда вазиятлар бошқармаси Яшнабод туманида содир бўлган ёнғин тўғрисида маълумот берди.
Қайд этилишича, 14 июль куни соат 22:10 да Яшнабод тумани, “Ватандош” МФЙ Тузел даҳаси 12-А уйдаги хонадонларнинг бирида ёнғин содир бўлаётгани тўғрисида пойтахт ФВБга хабар тушган.
Шунга кўра, ёнғин-қутқарув экипажлари соат 22:18 да воқеа жойига етиб бориб, ёнғин соат 22:33 да ўчирилган. Содир бўлган ёнғин натижасида хонадондаги уй жиҳозлар ёнган.
Ёнғин сабаби ва моддий зарар миқдори аниқланмоқда. Ҳодиса оқибатида тан жароҳати олган ва ҳалок бўлганлар йўқ.
Аввалроқ Сурхондарёда бешта савдо дўконида ёнғин содир бўлгани, Тошкентдаги автосервисда 3 та автомобиль ёниб кетгани, “Космонавтлар” метро бекати яқинида ерости кабели ёнгани тўғрисида хабар берилганди. Шунингдек, Тошкентдаги “Чорсу” бозорида ёнғин чиққан эди. Шаҳар ва туман ҳокимликлари вакиллари ёнғиндан зарар кўрган тадбиркорлар билан учрашган.
