Машҳур ирландиялик аралаш яккакураш (MMA) жангчиси, икки вазн тоифасида собиқ UFC чемпиони Конор Макгрегор октагонга қайтиши мавзусида гапирди.
“UFC билан шартномам тугашига яна иккита жангим бор. Ҳозир музокаралар олиб бормоқдаман. Менинг иштирокимдаги “Йўл бўйидаги уй” фильмини тарғиб қилиш ишлари тугагач, ўзимни изоляция қиламан. Ва мен октагонга қайтиш устида ишлайман. Мен буни жуда хоҳлайман. Биз ҳозир 2024 йилнинг биринчи чорагидамиз. Олдинда ҳали йилнинг катта қисми бор», - дея Макгрегор сўзларини келтиради MMA Fighting.
Конор 2021 йилнинг ёзидан буён жанг ўтказмаган. Ўшанда у АҚШ вакили Дастин Порьега ютқазиб, жангда оёғини синдирган эди. Макгрегор аввалроқ навбатдаги жангини 2024 йил 29 июнь куни ўтказишга умид қилаётганини айтган ва ўзига рақиб сифатида Майкл Чандлерни кўрсатган эди.
