UFC енгил вазн тоифасининг янги чемпиони Жастин Гейтжи илк бор чемпионлик камарини ҳимоя қилиш учун Конор Макгрегорга қарши жанг ўтказиши мумкинлигини айтди.
Гейтжи Оқ уйда ўтказилган UFC Freedom 250 турнирида Илия Топурияни мағлуб этиб, мутлақ чемпионлик унвонини қўлга киритганди.
Америкалик жангчи кейинги рақиби сифатида ирландиялик собиқ ярим енгил ва енгил вазн тоифаси чемпиони Конор Макгрегорни кўриб чиқаётганини маълум қилди. Унинг фикрича, аввалроқ ўзини мағлуб этган Макс Холлоуэй ва Чарльз Оливейрага қарши реванш жанглари ҳозирча шарт эмас. Чунки Топурия ҳар икки жангчини ҳам мағлуб этган, Гейтжи эса ўз навбатида Топуриядан устун келган.
“Менга қарши жанг қиладиган деярли ҳеч ким қолмагандек. Оливейра ёки Холлоуэй билан жанг қилишим мумкин эди. Аммо Топурия уларнинг иккаласини ҳам мағлуб этган. Шунинг учун Макгрегор билан жанг қилиш қизиқарли бўларди. Уни жим қилиш ҳам ёмон эмас”, деди енгил вазн чемпиони.
38 ёшли Макгрегор июль ойида беш йиллик танаффусдан сўнг октагонга қайтди. Бироқ у америкалик Макс Холлоуэйга қарши жангда ўнг оёғидан жароҳат олиб, баҳснинг 69-сониясидаёқ жангни давом эттира олмади.
Макгрегор охирги марта 2020-йилда ғалаба қозонган. Ўшанда у UFC 246 турнирида Дональд “Ковбой” Серронени мағлуб этганди.
Гейтжи эса кейинги рақиби борасида ҳали якуний қарорга келмаганини таъкидлади. У Арман Царукян ва Чарльз Оливейра ўртасида бўлиши режалаштирилган жанг бекор қилингани, Царукян энди Маурисио Руффига қарши рингга чиқишини эслатди. Ушбу ва бошқа йирик жанглар унинг кейинги рақиби ким бўлишини аниқлашда муҳим аҳамият касб этиши мумкин.
“Чемпион бўлиш ғалати ҳис экан. Аввал доим ортимда қувишим керак бўлган чемпион бўларди. Энди эса камаримни ҳимоя қилишим керак. Ҳозир аниқ бир рақиб ҳақида ўйламаяпман. Дунёнинг энг кучли жангчилари менга қарши чиқишга тайёр”, дейди Гейтжи.
Бироқ америкалик аралаш яккакураш устаси яқин вақт ичида октагонга қайтмайди. Топурияга қарши жангда қўлидан жароҳат олган америкалик спортчи ҳозир тикланиш жараёнини давом эттирмоқда. Шу боис унинг навбатдаги жанги 2027-йилгача бўлиши кутилмаяпти.
