Ўзбекистонга 20 июнь куни Кавказ ҳудудларидан нисбатан бир оз салқин ҳаво кириб келиши ҳисобига ушбу ҳафтада иссиқ бир оз пасайиши кутилмоқда.
“Ўзгидромет” прогнозига кўра, ҳаво ҳарорати иш ҳафтасининг охиригача 33-38 даража атрофида бўлади. Республиканинг энг чекка жанубида иссиқ ҳаво массасининг таъсири сақланиб туради. Ҳарорат асосан 39-41 даража, Сурхондарё вилоятида ҳафта ўртасига келиб, баъзи жойларда 42-44 даражагача иссиқ бўлади.
20 июнда Фарғона водийсида, шунингдек, кечаси ва эрталаб Тошкент вилоятида баъзи жойларда қисқа муддатли ёмғир ёғиши, момақалдироқ бўлиши мумкин.
Ҳафтанинг биринчи ярмида об-ҳавонинг беқарорлиги республиканинг тоғ олди ва тоғли ҳудудларида сақланиб туради — баъзи жойларда қисқа муддатли момақалдироқли ёмғирлар ёғади. 19 июнь, куннинг иккинчи ярмида ва 20 июнь куни баъзи жойларда ёмғир кучли ёғади, дўл ёғиши эҳтимоли бор.
19—20 июнь кунлари республика бўйича баъзи жойларда, 23 июнда жанубда ва чўл ҳудудларда шамолнинг кучайиши, айрим жойларда чанг-тўзон билан кузатилиши кутилмоқда.
Тошкентда ҳаво бир оз булутли бўлади, вақти-вақти билан ўзгариб туради, ёғингарчилик кутилмайди, фақат кечаси ва эрталаб 20 июнда қисқа муддатли ёмғир ёғиши, момақалдироқ бўлиши мумкин. Ҳаво ҳарорати 19 июнда 38-40 даража, кейинчалик иш ҳафтасининг охиригача 35-37 даража бўлади.
