Бугун, 20 апрель куни Тошкентда Фавқулодда вазиятлар вазирлиги тизими ходимлари иштирокида “Конституция ўзимизники” тарғибот тадбири бўлиб ўтди. Бу ҳақда “Дарё” мухбири хабар берди.
Тадбирда вазирлик тизимида фаолият олиб борувчи ходимлар, шу соҳада ишлаб, хизмат вақтида ҳалок бўлган ходимларнинг оила аъзолари, ФВВнинг бўлажак хизматчилари ҳамда санъат ва маданият вакиллари иштирок этди.
Фавқулодда вазиятлар вазирлиги тизимида турли раҳбарлик лавозимларида ҳалол меҳнат қилган, бугун эса қарилик гаштини сураётган меҳнат фахрийси, захирадаги полковник Эргаш Икромов сўзга чиқиб, 1996 йилдан то бугунгача бўлган даврни эслади. ФВВ хизматининг шаклланиши, оёққа туриши ва ривожланиши ҳақида гапириб ўтди.
21 ёшида, хизмат вазифасини бажараётган вақтда вафот этган сафдор Суннатилла Каримжоновнинг отаси Тешабой Каримжонов ҳам сўзга чиқиб, агар ўғли ҳаёт бўлганида, бу йил 40 баҳорни қарши олган бўлишини айтди.
Тешабой Каримжонов фарзанди 2004 йили ёнғинни ўчириш чоғида вафот этгани, вафотидан сўнг “Жасорат” медали билан тақдирлангани, ўша вақтдан бери оиласидан ФВВ раҳбарлари хабар олиб тургани ҳақида гапирди.
Шунингдек, тадбирда маданият вакиллари иштирокида қўшиқлар куйланди.
“Дарё” мухбири ушбу тадбирдан фоторепортаж тайёрлади.
