Тошкент шаҳар, Олмазор тумани, Университет кўчасида жойлашган ошхонада 28 октябрь куни ёнғин юз берди, деб хабар бермоқда ФВВ матбуот хизмати.
Қайд этилишича, ёнғин содир бўлаётгани тўғрисидаги хабар Тошкент шаҳар Фавқулодда вазиятлар бошқармасига соат 13:44 да келиб тушган. Воқеа жойига 4 та ёнғин-қутқарув экипажи соат 13:50 да етиб бориб, ёнғин соат 14:03 да қуршаб олинган ва соат 14:09 да батамом ўчирилган.
Ҳодиса оқибатида жабрланган ва ҳалок бўлганлар йўқ. Ёнғин оқибатида ошхона биносининг 120 метр квадрат майдони ёниб зарарланган.
Ижтимоий тармоқларда ҳолат акс этган видеолар ҳам тарқалди. Унда ёнғин Тошкент давлат техника университети ёнидаги ошхонада юз берганини кўриш мумкин.
ФВВ матбуот хизмати хабарида айтилишича, ҳозирда ёнғиннинг келиб чиқиш сабаби ва моддий зарар миқдори аниқланмоқда.
