Макияж табиий гўзалликка урғу бериш ва янада чиройли кўриниш учун қилинади, лекин айрим хатолар туфайли исталган натижага эришмаслик мумкин. Қуйида образни бузиши мумкин бўлган макияждаги 10 хатони эълон қиламиз.
Тонал крем рангининг нотўғри танланиши
Оппоқ қизнинг юзи қизғиш, буғдой ранглилар эса оппоқ бўлиб кўринмаслиги учун юз ва тери рангидан келиб чиқиб тональ крем танлаш керак бўлади, акс ҳолда, юздаги камчиликларни беркитаман деб юзга ниқоб қилиб олгандек кўриниш мумкин.
Тўқ консиллердан фойдаланиш
Консиллердан фойдаланишда унинг ранги ва таркибига эътибор қаратинг. Консиллернинг ҳаддан ортиқ тўқ ранги юзингиздаги табиийликни йўқотиб, ёшингизга нисбатан катта кўрсатиши мумкин.
Тональ кремсиз пудра суртманг
Юзга пудрадан аввал тональ крем суртишни унутманг. Чунки тональ крем асос бўлиб хизмат қилади, асоссиз қуруқ пудра эса юзни қуритиб юборади, юздаги табиий намлик йўқолишига сабабчи бўлади.
Тушсиз кўз макияжи
Рангли тен суртиб, туш суртмаслик кўзларни чарчагандек кўрсатади, киприкларга тен қолдиқлари эса тартибсиз кўрсатади. Бундай бўяниш эса тугалланмаган макияж дейилади.
Кўзга бўрттириб «стрелка» чизиш
Подводка орқали «стрелка» чизиш кўзни катта-катта қилиб кўрсатиши рост, аммо бу борада меъёрни унутмаслик керак. «Стрелка» киприклардан анча тепада қалин ва кўзнинг ташқи бурчагидан анча ташқарида бўлмаслиги керак. Бу образни бачкана, эътибор тортадиган ва нотабиий кўрсатади.
Чизилган қошлар
Қош устидан қалам ёки тен билан бўрттириб чизиш кишини карикатура қаҳрамони сингари кўрсатади. Тартибсиз қошларни гел ва балзам билан бир йўналишга келтириш, четларини қалам ёрдамида озгина шакл бериш кифоя.
Юзни ҳаддан ортиқ қизартириб олиш
Румяна суртиш юз яноғини қип-қизил қилиб, «Марфуша» бўлиб олиш керак дегани эмас. Аввало румянани танлаганда тери рангига, унинг қуруқ ёки ёғли эканига, юзга суртилганда табиий қизғишдек туюлишига эътибор қаратиш керак. Меъёрида ишлатилган румяна қиёфани чиройли ва жозибадор кўрсатади.
Лаб четини чиқариб бўяш
Макияжни тартибсиз ва дидсиз кўрсатиш учун кўп нарса шарт эмас, шунчаки, лабнинг табиий чизиғидан ташқарига тўқ қалам билан чизиш етарли. Бундай образ, биринчидан, нотабиий; иккинчидан, кулгили кўринади. Рангига мос ва шаклидан чиқарилмасдан сурилган қалам аксинча лабларга сайқал беради.
Юзнинг барча қисмини ялтиратиш
Ҳайлайтер юзнинг бутун қисмини ялтиратиш учун ишлатилмаслиги керак. Юзнинг бурунга яқин қисми шундоқ ҳам ялтирайдиган зона бўлади, унинг устидан сурилган ҳайлайтер юздаги ёғ билан қўшилиб, қиёфани хунук кўрсатади.
Ҳаддан ортиқ контуринг
Контуринг юзни ихчамроқ кўрсатар экан, деб керагидан ортиқ қорайтириш юзга чизилгандек тасаввур уйғотади. Контуринг қилишдан аввал унинг техникаси билан интернетдаги видеолар орқали яхшилаб танишиб чиқинг, кейин бўлса терингиз ранги ва ёшингизга мос равишда ундан фойдаланинг. Асосийси, табиийликни сақлаган ҳолда бор гўзаллигингизга урғу беринг. Мавзуга доир:
