Ўзбекистондаги 128 нафар покистонлик Покистон халқаро авиакомпанияси (PIA)нинг махсус парвози билан 6 апрель, душанба куни ватанига қайтарилди. Бу ҳақда Покистоннинг AAJTV нашри хабар бермоқда.
Қайд этилишича, худди шу рейс орқали 22 нафар Ўзбекистон фуқароси Покистондан қайтарилган.
Ўзбекистондан олиб кетилган покистонликлар орасида мамлакатга қисқа муддатли визалар билан келган ва COVID-19 авж олганидан кейин халқаро рейсларнинг тўхтатилиши сабабли Покистонга қайтиб кела олмаган сайёҳлар ҳам бор.
Покистоннинг Тошкентдаги элчихонаси ўз фуқароларининг Ўзбекистонда бўлиш билан боғлиқ барча зарур шарт-шароитларни яратиб бергани таъкидланган.
Эслатиб ўтамиз, Ўзбекистонда коронавирус сабаб халқаро йўналишларда йўловчи ташиш 20 мартдан бошлаб 40 кун муддатга тўхтатилганди.
