Наманган вилоят ИИБ Ёнғин хавфсизлиги бошқармаси томонидан Наманган шаҳридаги «Динамо» ўйингоҳида ёнғинни ўчириш амалий спорти бўйича вилоят чемпионати ўтказилди. Бу ҳақда «Дарё»га ИИБ матбуот хизмати маълум қилди.
Мусобақа ўтказишдан кўзда тутилган асосий мақсад шахсий таркибнинг жисмоний ва жанговар тайёргарлигини ошириш, хизмат тайёргарлик машғулотларини ташкил этиш, ёнғинларни бартараф этишга ҳозирлаш, руҳий кўникмаларини шакллантириш ҳамда шахсий таркиб орасида бахтсиз ҳодисаларни олдини олишдан иборат бўлди.
Чемпионат уч турда — 4х100 метрли ёнғин ўчирувчилар эстафетаси, ишғол қилиш нарвони орқали ўқув минорасининг тўртинчи қаватига кўтарилиш ва жанговар ёйилиш йўналишлари бўйича ўтказилиб, унда 15 жамоа, жами 90 нафар ходим иштирок этди.
Ушбу мусобақада умумжамоа ҳисобида Наманган шаҳар ЁХБ 1-ҳарбийлашган ёнғин хавфсизлиги қисми биринчи, Наманган шаҳар ЁХБ 3-ҲЁХҚ жамоаси иккинчи ва Косонсой тумани ЁХБ жамоаси 3-ўринни эгаллаб, бошқарманинг фахрий ёрлиғи ва қимматбаҳо совғалари билан тақдирланди.
