Франциянинг Ўзбекистондаги элчиси Виолен де Вильмор The Mag журналига берган интервьюсида ўзбек тилида сўзлашишни исташини айтди.
«Бир нечта тилларни билиш, кенг дунёқараш — дипломат учун зарур бўлган сифатлар. Мен тарих, иқтисодиёт, менежментни ўрганяпман. Тилларга келсак, кўп ишлаган одам янги тилни ўрганиши қийин. Шунга қарамай, ўзбекча гапиришни ўрганишни жуда хоҳлайман. Тошкентга келганимда рус тили бўйича билимимни яхшилаш вазифаси ҳам турганди. Мактаб ва университетни битирганимдан кейин бу тилда сўлашмаган эдим», — деди элчи.
«Ўзимни аллақачон ўзбекча гапираётгандек қилиб кўрсатиш мақтанчоқлик бўлган бўларди. Асосийси — кунига ўнтадан сўз ўрганиш. Бу қоидага албатта риоя қилишда давом этаман, чунки ўзбек тили — чиройли, бой тил, у одамларни яхшироқ тушунишимга ёрдам беради», — дея таъкидлади Виолен де Вильмор.
