Фотогалерея: дунёнинг энг экстремал меҳмонхоналари

Дунёда шундай меҳмонхоналар борки, уларда фақат экстремал саргузашт ишқибозларигина тунаб қола олади. Қуйидаги фотожамланмадан ана шундай муассасалар ўрин олган.

Shanty Hotel

Бир қарашда ярим вайрона кулбага ўхшаб турган бино аслида беш юлдузли меҳмонхонадир. ЖАРнинг суд пойтахти Блумфонтейн яқинида жойлашган муассасанинг шиори — «Дунёдаги ягона поли қиздирилувчи хароба».

Гаражга ўхшаб турган хоналардаги шароит ҳам шунга яраша: мебель ва техника минимал даражада, ҳожатхона — кўчада. Овқат анъанавий африкача ўчоқда пиширилади.

Бундай гаражнинг биттасида тунаб қолиш учун сайёҳ 75 доллар тўлашига тўғри келади. Нонушта 10 доллар туради. Меҳмонхона ҳудудида бепул Wi-Fi ва спа-марказлар бор.

Dasparkhotel

Бу меҳмонхона эса мижозларга юқорисидагиданам қизиқроқ саргузаштни таклиф қилади — гаражда эмас, канализация қувурида ётиб қолиш.

Австрияда жойлашган меҳмонхона тежамкор туристлар ва очиқ осмон остидаги ҳаёт шинавандаларига мўлжалланган. Хона вазифасини бажарувчи қувур диаметри — 2 метр. Деразалар шифтда жойлашган. Хонага фақат битта ётоқ жойи сиғади.

Malmaison Oxford

Виктория асри қамоқхонаси биносида ташкил этилган муассасада бир кеча тунаб қолиш нархи — 125 фунт стерлинг.

Alcatraz

Германиянинг Alcatraz меҳмонхонаси ҳам қамоқ шаклидадир. Унинг юқоридаги рақобатчисидан асосий фарқи нархидадир — бу ерда 50 евро эвазига қолиш мумкин.

Бундан ташқари, Alcatraz’да танлов каттароқ: мижозлар қамоқхона камераси шаклидаги хоналарни ёки барча қулайликларга эга стандарт хоналарни танлаши мумкин.

Liberty

Бостондаги Чарльз-Стрит қамоқхонаси ўзининг «меҳмонлари» — жамоат арбоби Малкольм Икс, италиялик анархистлар Сакко ва Ванцетти билан машҳур. Бугун бинода дунёнинг энг шинам меҳмонхоналаридан бири жойлашган.

Меҳмонхонада бир кеча туриш учун ташрифчи 550 сарф қилишига тўғри келади.

Яна бир қизиқ факт шундаки, бир пайтлар қамоқхона бўлган бинонинг бугунги номи Liberty — озодлик.

Crazy House

Вьетнамдаги Crazy House меҳмонхонаси эса бир пайтлар жиннихона бўлган. Ундаги икки ўринли хоналар 30 долларга таклиф қилинади.

Бино меъмори — Вьетнам компартияси собиқ бош котибининг қизи Данг Вьет Нга.

Propeller Island City Lodge

Берлинда жойлашган Propeller Island City Lodge меҳмонхонаси янада қўрқинчлироқ концепцияга эга — унинг ташрифчилари тобутда тунаб қолиши мумкин.

Меҳмонхона Жюль Верннинг Propeller Island романи шарафига шундай номланган.

Тобут — Propeller Island City Lodge мижозларига таклиф этиладиган ягона «қулайлик» эмас. Айтайлик, ўткир ҳиссиёт ишқибозлари гильотина остида ёки шер қафасида тунаб қолиши мумкин. Тўғри, улар ҳақиқий эмас — қафас ичида шер йўқ, гильотина эса тегишли шакл берилган чироқдан бошқа нарса эмас.