Тошкент шаҳри Шифокорлар шаҳарчасида оммавий тўполон уюштирган тўппончали ўсмирлар қўлга олинди, деб хабар бермоқда «1news.uz».
«Ҳуқуқ» нашри хабар беришича, келишмовчилик шу ҳудуддаги «Офарин» ресторанида ўтган тўй пайтида юз берган. Дастлаб икки гуруҳ ёшлар пичоқ, дубинка ва таёқ билан ким кучли эканини аниқлашга уринган. Кейинги тўқнашувда эса ўсмирлар пневматик тўппонча, пичоқ, бензин ёрдамида тайёрланган тез ёнувчи аралашма воситасида бир-бирига ҳамла қилган.
Ур-тўполон пайти ўсмирлардан бири жиддий жароҳатланган, шифокорлар оғир аҳволдаги йигитнинг ҳаётини сақлаб қолган. Қайд этилишича, жамиятдаги тартибни менсимай, шафқатсизлик ва одам ўлдиришга қасд қилган ўсмирлар тезкор тадбирда қўлга олинган.
Тошкент шаҳар прокурори ўринбосари Жасур Охунов айтишича, мудҳиш ҳодисада қатнашганлар асосан 1994—1998 йилларда туғилган ўсмирлардир.
