Google Docs матнли ҳужжатларни сунъий интеллект подкастларига айлантиришни ўзлаштирди

Google Docs матн муҳаррири Gemini сунъий интеллект ёрдамида ҳужжатларнинг аудио версияларини яратишни ўрганди. Бу ҳақда The Verge нашри хабар бермоқда.

Шу билан бирга, фойдаланувчиларга матнни ижро этиш созламаларидан фойдаланиш имконияти берилган. Хусусан, диктор овозининг бир нечта туридан бирини танлаш, шунингдек, ўқиш тезлигини созлаш мумкин.

Янги функциядан нафақат ҳужжат яратувчиси фойдалана олади, балки Google’нинг таъкидлашича, ўқувчилар ҳам “Асбоблар” очилувчи менюсидан “Аудио” бандини, сўнгра “Ушбу саҳифани тинглаш” пунктини танлаш орқали умумий ҳужжатнинг сунъий интеллект томонидан яратилган аудиосига кира оладилар. Бундан ташқари, муаллифлар бевосита ҳужжатга аудиони тинглаш учун созланадиган тугмани қўшишлари мумкин. Бу эса ўқувчиларга бир марта босиш орқали тинглашни бошлаш имконини беради.

Google ҳужжатларни сунъий интеллект подкастларига айлантириш режаларини апрель ойида эълон қилган эди. Функцияни ишга туширишнинг дастлабки босқичида фақат битта тил - инглиз тили мавжуд.

Ҳозирча Google Docs хизматидаги янги функция фақат Business, Enterprise ёки Education тариф режаларига эга бўлган Workspace фойдаланувчилари, шунингдек, AI Prо ва Ultra обуналарига эга бўлган фойдаланувчилар учунгина мавжуд.

Бундан аввал Google Gemini Guided Learning воситасини ишга туширишини эълон қилганди. Бу восита интерактив сунъий интеллект репетитори сифатида тақдим этилмоқда.