АҚШ президенти Адлия вазирлигига икки собиқ расмий — Майлс Тейлор ва Крис Кребсга қарши тергов ўтказишни буюрди. Улар Дональд Трампнинг биринчи президентлик муддатида у билан бирга ишлаган, аммо кейинчалик очиқ танқид қилганди. Бу ҳақда The Guardian хабар берди.
Трамп кеча, 9 апрель куни имзолаган махсус меморандумга кўра, тергов жараёнлари давлат сирларини ошкор қилиш ва президентга қарши “хоинона” ҳаракатлар билан боғлиқ айбловлар асосида олиб борилиши мумкин.
Майлс Тейлор Ички хавфсизлик департаментининг собиқ штаб бошлиғи бўлиб, 2018 йили New York Times газетасида “Мен Трамп маъмуриятидаги қаршилик ҳаракатининг бир қисмиман” сарлавҳаси билан аноним мақола чоп этган эди. У кейинчалик ўз шахсини ошкор қилиб, А Warning (“Огоҳлантириш”) номли китоб чоп қилди.
Ўз навбатида, Трамп Тейлорни Оқ уйдаги чиқишида “жосусга ўхшаган хоин” деб атади.
“Мен айтаман, бу Майлс Тейлор дегани ким ўзи? У аноним тарзда китоб ёзди, ёлғонлар тарқатди. Бу хоинлик, жосуслик билан тенг”, деди президент.
Тейлор АҚШ президентининг бу сўзларига Х ижтимоий тармоғи орқали жавоб қайтариб, бу ҳолат Трамп “сиёсий репрессияларга мойиллигини яна бир бор исботлаши” ҳақида ёзди:
“Мен бу содир бўлишини айтгандим. Мухолиф фикр билдириш жиноят эмас. Бу, албатта, хоинлик ҳам эмас. Америка қоронғи йўлга кириб бормоқда. ”
Нишонга олинган иккинчи шахс Крис Кребс бўлиб, у Қўшма Штатларнинг Киберхавфсизлик ва инфратузилма хавфсизлиги агентлиги (CISА) раҳбари сифатида ишлаган.
Трамп Кребсни “сайловни сохталаштиришда кўмаклашиш” ва “сўз эркинлигини бостириш” кабиларда айблаб, унга қарши жиддий чоралар кўрилишини билдирди.
“Бу одам сайлов энг хавфсиз бўлганини айтди. Йўқ, бу сайлов фалокат эди. Агар бу ёлғон бўлса, у албатта жавоб беради”, деди у.
Бу орқали Трамп Кребснинг 2020 йилги президентлик сайловлари ҳақида айтганларини эслатди. Ўшанда у Дональд Трампнинг мағлубиятидан мамнунлигини яширмай, “бу энг хавфсиз сайлов бўлди” деганди.
Изоҳ (0)